COVID-19: Kazu Foun 21, Rekopera Na’in-1 no Ativu 247

by -1.815 views

Timor Post (24/3/2021)- Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Sentru Integradu Jestaun Krize,  Rui Maria de Araújo, Kuarta (24/3) informa Timor-Leste deteta tan kazu covid-19 na’in 21.

Númeru ne’e kazu na’in 20 hosi Munisípiu Dili na’in 1 ida hosi munisípiu Baukau, entre kazu sira ne’e maioria la iha sintoma. Enkuantu kazu rekupera ida no total kazu iha Timor hamutuk 247.

“Ohin, iha Munisípiu Dili iha kazu foun 20. Kazu pozitivu 3 hela iha Aldeia Bidau Mota-klaran, Suku Bidau Santana, Postu Administrativu Cristo Rei. Kazu pozitivu 7 hela iha Aldeia 20 de Setembru, Suku Bebonuk, Postu Administrativu Dom Aleixo.

Kazu pozitivu 4 hela iha Aldeia Sagrada Família, Suku Bidau Santana, Postu Administrativu Cristo Rei.  Kazu pozitivu 2  hela iha Aldeia Bekusi-Sentru, Suku Bekora, Postu Administrativu Cristo Rei. Kazu  pozitivu 1 iha fatin kuarentena Hotel Ramelau. Kazu pozitivu 1 hela iha Aldeia 30 de Agostu, Suku Komoro, Postu Administrativu Dom Aleixo.

Kazu pozitivu ida hela iha Aldeia Metin I, Suku Comoro, Postu Administrativu Dom Aleixo. Pozitivu ida ne’e kontaktu-besik husi kazu ida iha cluster 20 de Setembru, kazu pozitivu 1 hela iha Aldeia 02, Suku Fatuhada, Postu Administrativu Dom Aleixo. Pozitivu ida ne’e deteta iha atividade vijilánsia sentinel iha Sentru Saúde Comoro, ho nune’e, kazu detetadu ka pozitivu iha Munisípiu Dili husi dia 7 de Marsu 2021, to’o ohin, 24 de Marsu de 2021, hamutuk hotu 217,” relata Eis Ministru Saude Rui Maria de Araújo.

            Nia hatuan Kazu detetadu 217 iha Dili ne’e, fahe ba cluster 42, namkari iha instituisaun 4, eventu 1 no fatin kuarentena 2, suku 14, iha Postu Administrativu D. Aleixo, Vera Cruz, Nain Feto &

Cristo Rei. Husi cluster 42 ne’e, iha cluster 14 maka semana 1, loron 6, la iha kazu foun.

Hakat ba munisípiu Baukau Eis PM deklara iha Munisípiu Baukau, ohin iha kazu foun 1. Kazu ida ne’e, kontaktu besik husi iha Aldeia Builé Suku Babú. Hamutuk hotu iha Baukau iha 20 Kazus detetadus iha klauster 7.

Iha Munisípiu Viqueque, Rui dehan ohin la iha kazu foun. Hamutuk hotu Munisípiu Viqueque deteta ona kazu konfirmadu na’in 10.

Iha Munisípiu Lautem mós ohin la iha kazu foun. Dadus jerál iha loron Kuarta (24/3) ne’e Kazu foun ohin: 21.  Kazu rekuperadu: 1 no  Kazu ativu: 247.

Eis Primeiru Ministru ne’e kontinua apela ba populasaun ne’ebé saí husi Dili ba munisípiu sira seluk, entre dia 5 to’o dia 9 de Marsu madrugada, molok serka sanitaria hahú tama iha vigor iha Dili, atu favor ida aprezenta-an ba autoridade saúde sira ne’ebé besik hela fatin, hodi bele hetan atendimentu.

Rui apela mós ba komunidade iha munisípiu sira hotu, bainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira atu bele halo atendimentu ba sira.

Nia apela mós ba populasaun iha Munisípiu Dili no mós Munisípiu sira seluk: bainhira sente isin manas, kakorok moras, inus-ben, mear, favor hakat ba Sentru Saúde ne’ebé besik-liu atu bele hetan atendimentu, no apela ba populasaun Timor-Leste tomak, liu-liu iha Munisípiu Dili, Baukau, Viqueque ho Lautém, atu nafatin hakmatek iha uma-laran. Favor lalika buka halibur malu. Wainhira sai husi uma, labele haluha proteje-an nafatin ho meius hanesan:  Uza mascara;  fase liman beibeik ho sabaun ka dezinfetante ruma;  evita kose liman ba matan, inus ho ibun; bainhira kumprimenta malu, la presiza ka’er liman, bensa-liman, rei-malu ka hakohak malu; (e) evita halibur malu barak; (f) hamriik ka tuur do’ok husi ema seluk, mínimu metru ida ho balun.(***/nty)

No More Posts Available.

No more pages to load.