COVID-19 Implika Acelda Exporta Mina Kamii

by -113 views
Ilustrasaun

DILI (Timor Post)—Moras daet COVID-19 implika atividade esportasaun mina kamii husi Kompania Acelda. Nune’e, iha fulan ikus ne’e kompañia seidauk hetan order husi parseiru internasionál sira.

“Kona ba esportasaun nian, ita rasik mak halo ligasaun ho parseiru ne’ebé mak husi rai li’ur. Maibé daudaun ne’e seidauk iha order husi parseiru sira,” hatete Diretór Ezekutivu Kompañia Acelda, Eugenio da Costa Freitas, ba Timor Post via telefone, Segunda (04/10).

Maske nune’e, nia haktuir, iha fulan Agostu liu ba, Acelda Unipesoal Lda konsege esporta bidón 76 ka tonelada 15 (15.200 litru).

Ho situasaun Covid-19 ne’e afeta mós ba sirkulasaun empreza nian ba hosi tetu kamii iha komunidade nia leet. Produsaun mina kamii kontinua la’o no daudaun ne’e iha 17 tonelada mak iha armazena Acelda nian.

Nia dehan, ho montante tonelada 15 ne’e konverte ba osan hetan $80 mill no 17 tonelada ne’e bele $100 mill. No maioria parseiru husi Acelda nian husi nasaun Amérika no Cina.

Ho situasaun ne’e agrikultór sira ladún ona tau prioridade ba produsaun mina kamii, kada semana komesa menus ba beibeik. Dala ruma mós semana ida bele hetan kilo haat nulu resin.

Husi tinan 2005 mai too 2014 maioria komunidade produsaun kamii moos ho volume ne’ebé boot kompara ho ohin loron nian.

Iha sorin seluk, komunidade Suku Loilubo, postu administrativu Vemasi munisípiu Baukau, Januário da Conceição da Freitas, kompañia Acelda kontinua tetu kamii.

“Sira kontinua tetu, kilo ida ho folin mak $1.00 tuir presu merkadu nian. Agora daudaun ne’e ema ladún tetu kamii ona tanba ho situasaun Covid-19,” hatete nia.

Nia dehan, tetu kamii semana ida dala rua, iha loron Segunda no Kinta. No maioria komunidade iha suku ne’e tetu kamii tuir nesesidade loron-loron nian. Kada ema ida lori kamii barak liu kilo ruanulu.

Tuir nia, komunidade maioria ladún tau importante ba produtu mina kamii maski folin boot iha merkadu. No komunidade ladún prezerva mina kamii no halo kultiva foun ba kamii oan sira. (jho)

No More Posts Available.

No more pages to load.