COVID-19: Governu Xina Apoiu Ekipamentu Protesaun ba Parlamentu Nasional

by -143 views

Timor Post (24/06/2020) – Governu Xina liu hosi ninia Embaixada iha Timor-Leste entrega Ekipamentu Protesaun Pesoál (EPP) órgaun lejizlativa Parlamentu Nasionál (PN). Ekipamentu hirak ne’e maka hanesan máskara rihun lima (5000) no Hand Sanitizer no luvas balun.

“Xina iha kooperasaun di’ak ho governu Timor-Leste la’ós foin daudaun, iha tinan kotuk Xina fó apoiu ba Timor-Leste liu hosi parlamentu no departamentu sira seluk”, hatete Embaixadór, Xiao Jianguo, iha salaun Embaixada Xina, Praia dos Coceiros Dili.

Embaixadór, Xiao hatutan ekipamentu protesaun pesoál ne’e, alende fahe ba deputadu no deputada sira, sei fahe mós ba estudante sira hodi uza iha luta hasoru Covid-19.

 Fatin hanesan Vise Prezidente Parlamentu Nasionál, Luis Roberto, rekoñese Xina la’ós foin primeiru vés mak ajuda Timor-Leste, maibé beibeik ona.

“Hakarak atu hatete ba iha públiku katak ho serimónia hand over simplest ida ne’e governu Xina la’ós primeiru ves atu ajuda ita, maibé Timor-Leste sei dauk ukun an mós sira ajuda nanis ona”, haktuir Luis Robesto.

Roberto hodi parlamentu naran hato’o agradese ba Governu Xina liu hosi sira nia embaixada iha Timor-Leste, ba  ajuda   máskara, luvas  no sabaun uza ba fase liman (hand sanitizer).(Jornalista: Julio Salinas Soares)

No More Posts Available.

No more pages to load.