COVID-19: Governu Aprova Proposta Retifikasaun OJE 2021

by -347 views

Timor Post (24/03/2021)—Governu daualu lideradu Primeiru Ministru Taur Matan Ruak aprova tiha ona proposta retifikasaun ba Orsamentu Jerál Estadu (OJE) 2021 nian hodi responde ba nesesidade sira iha luta kontra moras daet COVID-19 iha Timor Leste durante fulan sia (9) nia laran.

Proposta reatifikasaun ne’e governu sei aprejenta nu’udar proposta lei ba Parlamentu Nasionál (PN) hodi halo diskusaun no aprovasaun final global i sei haruka ba Prezidente Repúblika Francisco Guterres Lú Olo promulga.

Ministru Prezidénsia Konsellu Ministru, Fidelis Leite Magalhães subliña, proposta alterasaun ba osan liu milaun $200 maibe ne’e sei la suplementa ka foti tan osan husi fundu petrolíferu, maibé ajusta de’it OJE 2021 hodi apár ho programa sira governu hala’o liuliu ba nesesidade sira ba kombate COVID-19 inklui rekoperasaun ekonomia no difinisaun sira kona-ba front line no seluk tan.

“Ida ne’e importante tebes, tanba ho hanesan ne’e maka it abele responde ba nesesidade sira urjente agora nian sein tau iha risku ita nia sustentabilidade fiscal,” Fidelis subliña.

Antes ne’e, Jurista senior nu’udar Eis Prezidente Konsellu Konsultivu Fundu Petrolíferu (KKFP), Amu Júlio Crispim fó solusaun ba governu ida ne’e atu infrenta situasaun difisil iha luta kontra COVID-19 maka, haree ba OJE tinan 2021 ladun kompletu, dalan iha ba governu halo retifikasaun hodi hatama material ruma ne’ebé maka la prevé iha orsamentu inisiál.

Amu fó hanoin ida ne’e atu prevene governu nia hanoin atu foti tan osan husi fundu petrolíferu tanba nia pesimista ho kapasidade membru governu sira nian iha ejekusaun.

Amu dehan, kapasidade ejekusaun to’o agora hatudu menus tebes la sura ba kapasidade ejekusaun iha item saláriu no vensimentu. “Kapitál menor no kapital dezenvolvimentu ne’e kuaze laiha. Tanba ne’e, ha’u nia hanoin simples no ideal liu halo ratifikasaun atu ajusta fali orsamentu ne’ebé mak to’o agora fulan tolu ona la ejekuta, bele ajusta i loke fali alokasaun foun,” Amu Crispim subliña.

Tanba ne’e, Amu hatutan, problema agora la’ós iha levantamentu OJE 2021 maibé problema iha ejekusaun.

Kona-ba ejekusaun OJE ba kapital dezenvolvimentu to’o agora la la’o, Amu dehan, difikuldade ne’ebé Amu nota maka atake moras COVID ne’ebé la loke governu nia foku ba área refere.

“Ha’u haree sé iha tinan ida ne’e maka iha hela de’it COVID hanesan ne’e, capital dezenvolvimentu sei la ejekuta ida inklui capital menor. Kala ejekuta másimu maka saláriu i vensimentu ho beins servisu balu,” Amu Crispim salienta.

Entretantu Parlamentu Nasionál (PN) aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1,895.

Orsamentu 2021 ho montante biliaun $1,895, foti hosi reseita fundu minarai biliaun $1,377 no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20. (cao)

No More Posts Available.

No more pages to load.