COVID-19: Brigadeiru Jeneral Aluc deklara Mantein Forsa iha Fronteira

by -393 views
Brigadeiru Jeneral João Miranda "Aluc"

Timor Post (26/03/2021)—Diretór Sentru Integradu Jestaun Krize (SIJK), Brigadeiru Jeneral João Miranda “Aluc” deklara, maske governu liuhusi konsellu ministru hakotu ona serka sanitária iha Bobonaro ho Kovalima, maibé forsa kontinua mantein hodi halo vizilánsia ba movimentasaun ilegál sira.

“Ita labele haluha katak munisípiu rua ne’e iha fronteira, tanba kazu ne’ebé mak tama iha ita nia rain ne’e la monu husi lalehan no la mai husi tasi maibé mai husi rai,” Brigadeira Aluc ba jornalista sira iha Palásiu Governu, Dili, Sesta (26/03) hafoin enkontru ho Primeiru Ministru, Taur Matan Ruak.

Aluc rekoñese iha duni difikuldade ba forsa sira liuliu aihan maibé ne’e la sai obstákulu boot.

“Maski hahán ba forsa sira iha fronteira ne’e iha duni difikuldade maibé ida ne’e mak problema ita hasoru, maibé ne’e la sai hanesan obstákulu ba instituisaun rua F-FDTL no PNTL,” Aluc subliña.

Nia hatutan, kna’ar forsa nian atu asegura povu husi risku sira hotu. Tanba ne’e, nia parte kontinua ho medida ida ne’e atu garante nafatin seguransa iha fronteira.

Enretantu, hafoin semana hirak nia laran governu deklara serka sanitária iha Munisípiu Bobonaro ho Kovalima, situasaun fila ba normal bainhira relatóriu husi SIJK rasik katak pasiente sir aba moras daet COVID-19 menus ona no bele iha ona kontrola iha area fronteira, nune’e governu hapara ona medida ne’e.

Jornalista Jaime Pires

Editór Noémio Falcão

No More Posts Available.

No more pages to load.