COVID-19: Arsenio Bano hapara Operasaun Ró ba Oekusi, Juventude Sira husu Taka Mak Fronteira

by -372 views

Timor Post (26/12/2020)—Prezidente Autoridade Rejiaun Autónomu Espesial Oekusi Ambeno (PA-RAEOA), Arsenio Bano hapara tiha ona operasaun ró tanba iha rejiaun ne’e rejista ona pasiente COVID-19 na’in-3.

Juventude Oekusi oan sira kontra maka’as desizaun ne’ebé fó sai husi PA-RAEOA iha loron 24/12/2020 ne’e, no husu ba PA Arsenio atu servisu ho sériu prevene moras daet ne’e tama Oekusi ho taka fronteira no halo kontrolu maka’as ba movimentasaun ilegal sira.

“Moras ne’e la’ós husi Dili mak ba, maibé husi fronteira,” Porta-Voz Marcelo Nicolau da Cruz hato’o lamentasaun ne‘e bainhira ho nia kolega sira ba hala’o asaun protesta iha Edefísiu PA-RAEOA, iha Farol, Dili.

Tuir Marcelo, pasiente COVID-19 na’in-3 iha Oekusi ne’e foin mak mosu sintoma.

Ho rajaun hirak ne’e, Marcelo husu ba PA atu tetu fali desizaun ne’ebé fó sai ona, tanba inan-aman no família barak mak foin lalais ne’e husi Oekusi ba Dili hodi asiste sira nia oan sira graduasaun, sira tenke fila fali ba Oekusi tanba se kontinua hela iha Dili maka impaktu boot ba ekonomia uma laran.

“Sira tenke fila, se sira hela ho familia, entaun nesesidade ekonomia aumenta,” Marcelo hatete.

To’o notísia ne’e públika, Jornalista Timor Post seidauk hetan konfirmasaun husi PA-RAEOA Arsenio Bano. (cao)

No More Posts Available.

No more pages to load.