Colegio São José Operário Preparadu ba Ezame

by -145 views

DILI (Timor Post)— Manorin sira iha Eskola Katólika Colégio São José Operário durante ne’e esforsu rekopera matéria ba estudante sira no hein de’it orientasaun husi governu atu realiza ezame ba periodu daruak.

Diretór Eskola Colégio São José Operário Balide, Padre César Magno, hatete razaun eskola preparadu atu realiza ezame segundu períodu tanba sira haka’as an nafatin oinsá atu sustenta nafatin estudante sira mezmu konfinamentu obrigatóriu maibé tenke iha mekanizmu atu aprende nafatin.

“Tuir kalendáriu normal ohin loron ezame hotu ona maibé komu matéria tarde mak muda ba loron seluk, ami hetan ona informasaun katak fulan Setembru mak realiza ezame segundu períodu. Ida ne’e eskola preparadu,” nia informa ba Timor Post iha nia kna’ar fatin Balidi, Segunda (09/08).

Nia hatete, tinan ida ne’e ezame primeiru períodu mós eskola sira iha Dili la konsege atu realiza maibé eskola esforsu buka mekanizmu fahe eskrita prienxe hotu mai hatama fali no agora sira-nia valor iha ona hein tan segundu períodu nian.

“Ami prepara kedan bainhira reativa eskola ami prepara ona mais muda ezame entaun agora foku ba rekupera matéria sira halo avaliasaun hodi prepara ba ezame iha fulan Setembru,” nia dehan.

Alende rekuperasaun matéria eskola mós kontinua la’o tuir regra ministériu saúde tanba agora informasaun katak variante foun mós pozitivu barak ona iha munisípiu Ermera.

“Ami 95% husi profesór sira ne’ebé simu ona vasina, segundu nafatin kumpre protokolu saúde hanesan iha portaun boot seguransa sira hein kuandu tama mai koko uluk lori termu-scanner depois ami prepara bee fase liman, kontrola nafatin sira uza máskara,” nia dehan.

Total profesór iha eskola Colégio São José Operário Balidi hamutuk 131 kompostu husi ensinu báziku primeiru no segundu siklu hamutuk 34, ensinu báziku terseiru siklu 39 no ensinu sekundáriu 58. Total estudante hamutuk 2.352 kompostu husi ensinu báziku primeiru no segundu siklu hamutuk 776, ensinu báziku terseiru siklu 699 no ensinu sekundáriu 877. (ono) Lee notísia seluk iha Jornal Timor Post

No More Posts Available.

No more pages to load.