CNRT Sei La Partisipa Iha Serimónia Hatuur Meza PN, Krize Polítika Sidauk Hotu 

husi -262 views

Timor Post (01/09/2020)-Vise Xefe Bankada CNRT, Patrocínio Fernandes, afirma iha loron 4 fulan Setembru 2020 bankada CNRT sei la partisipa iha serimónia hatuur hikas meza ne’ebé rahun iha 18-19 Maiu liubá.

“Tuir planu iha loron 4 fulan ida ne’e parlamentu Nasionál sei hatuur hikas meza parlamentu, maibe bankada CNRT sei la hola parte hodi partisipa iha prosesu hatuur meza ida ne’e. CNRT nia pozisaun la partisipa iha prosesu ne’e tanba meza baku fila problema konstituisaun, no ema tenta atu hetan podér ne’ebé la liu hosi dalan konstituisaun, la liu hosi dalan lei sira ne’ebé vigora iha rai ida ne’e,” Patrocínio afirma iha entrevista ho Jornalista  iha PN, Tersa (01/09).

Patrocinio hatutan nasaun la resolve meza ne’e ho hamulak se ita atu harii hikas meza ne’e ninia fukun ne’e saida, fukun ne’e mak violasaun konstituisaun.

Eis Vise Prezidente CNRT Munisípiu Manufahi ne’e kestiona, parlamentu nasionál fatin ba atu halo lei ba aban bain rua ema hotu atu bele halo lala’ok estadu nian ne’e tuir lei, maibé ohin loron sama tiha lei ba rai depois kredibilidade parlamentu nasionál nian ne’e tau iha se.

“CNRT la partisipa iha prosesu hatuur meza parlamentu ne’e la viola Rejimentu tanba laiha Rejimentu laiha artigu ida hatete dehan serimónia harii meza. Iha Rejimentu artigu 1 to’o 2 karik ha’u sala mas ha’u seidauk hetan artigu ida ko’alia kona ba harii meza,”, tenik tan deputadu ne’e

Molok hakotu nia dehan úniku dalan hakotu impasse iha Prezidente repúblika nia liman, tanba figura ida ne’ebé atu asegura garante funsionamentu estadu ninian tuir konstituisaun RDTL ne’e Prezidente repúblika.

“Bainhira Prezidente repúblika tenta ona viola konstituisaun laiha dalan atu bele hakotu impasse polítika, dalan úniku so prezidente repúblika tenke fila hanoin katak nia ema gerrilleiru ida, ema Rezisténsia boot ida ne’ebé presiza tau aransas di’ak ba jerasaun foun mai atu fó dignidade nasaun nu’udar estadu de direitu demokrátiku”, Patrocínio hakotu.(Jornalista Julio Salinas Soares)