CNRT konsidera Proposta Projetu Lei OJE 2021 Inkonstitusionál

by -171 views

Timor Post (2 Dezembru 2020)- Bankada opozisaun iha Parlamentu Nasional (PN) liuhosi Vice Xefe Bankada Parlamentár CNRT, Patrocinio Fernandes, deklara Proposta Projetu Lei (PPL) Orsamentu Jerál Estadu (OJE) 2021 inkonstitusionál tanba mosu versaun rua diferente.

“Iha versaun 2, versaun Komisaun A no versaun Komisaun C iha Parlamentu Nasionál. Bankada CNRT, hein desizaun Presidente Repúblika hodi haruka ba Tribunal Rekursu hodi haree situasaun ne’e”, deklara Patrocinio hodi CNRT abandona plenária iha votasaun jeneralidade OJE 2021, Kuarta (02/12).

Rezultadu ba votasaun jeneralidade ho votus 44 afavor no 21 la vota, nune’e proposta OJE 2021 pasa iha jeneralidade.
Iha parte seluk Xefe Bankada FRETILIN, Deputadu Francisco Miranda Branco, hatete OJE tinan 2021 hanesan momentu ida importante tebes ba Estadu nia vida, karik la importante ba maluk sira foin sai daudaun nee (refere ba Bankada CNRT).

“Liu tiha tinan tolu resin, ita nia Estadu la’o de’it ho duodesimu, ne’ebé provoka resesaun ekonómika no afeta tebes ba ita nia Povu doben nia moris. Tanba nee Bankada FRETILIN louva no valoriza tebes Estadu no Povu Maubere nia maturidade no nia kapasidade rezilénsia hasoru krize ekonomia iha rai laran durante tinan tolu resin, tan de’it Partidu CNRT buka halimar ho konfiansa ne’ebé Povu depozita ba sira liu hosi eleisaun”, Branco deklara.

Orsamentu Jerál Estadu ba tinan 2021 ne’e Governu aprezenta ho total USD 1.797,2 ne’ebé fahe ba kategoria sira mak hanesan; Saláriu e Vensimentu $228,2 milhões; Bens e Serviços $397,3 milhões; Transferénsia Públicas $694,9 milhões; Capital Menór $58,8 milhões no Capital Dezenvolvimentu $417,7 milhões. (Jornalista : Julio Salinas Soares)

No More Posts Available.

No more pages to load.