CNRT Konsidera MP no Governu Futu Lia Maka Aumenta Osan ba Konstruksaun Ró Haksolok

by -72 views

Timor Post (16/12/2020)-Proposta Orsamentu Jerál Estadu (OJE) 2021 montante Biliaun $ 1.895 inklui 14 miloens aumenta ba  Ró Haksolok pasa tiha ona ho votus 44 afavor, kontra 0, CNRT 21 auzénsia.

Maski prezidente da Repúblika Francisco Guterres Lu-Olo seidauk aprova, bankada opozisaun Partidu Congreço Nasionál Reconstrução Timor(CNRT), dehan aumenta iha orsamentu ba ró haksolok mai hosi planu atu futu lia entre MP ho Governu nian.

Xefe Bankada CNRT,  Duarte Nunes deklara, antes ne’e Prokuradór  José Ximenes fó sai públiku katak  Ró haksolok iha ona prosesu judisiál. Kaer ba ida ne’e CNRT konsidera futu lia.

“Ministériu Públiku mak deklara katak sira halo ona prosesu ba Ró Haksolok, Ami ko’alia tanba saida mak tau tan osan?  Tuir loloos labele tau osan lai tanba iha ona prosesu judisiál nia laran ?, Ami la konkorda. Ne’e mak ami dehan ita boot sira atu futu lia hamutuk hodi, estraga osan povu nian,” nia haktuir”, kestiona deputadu Duarte Nunes liu husi konferénsia imprensa iha PN, tersa (15/12/2020).

 Iha fatin hanesan deputadu, Arão Noé de Jesus Amaral eis prezidente PN hatete, CNRT nia pozisaun suspende lai. Labele tau osan lai. Husik prosesu judisiál la’o, to’o final komprova katak nia prosesu ne’e legal, tratamentu sira ne’e legal, ita bele tau osan.

“Se la legal la tuir prosesu normal, ema ne’ebé mak halo tenke responsabiliza hodi ba hatán, tanba ne’e maka CNRT kontra tau osan $14 miloens ba Ró refere tanba pagamentu final tiha ona”, Arão reforsa.

 Hatan ba ida ne’e  deputadu bankada FRETILIN, Joaquim dos Santos hatete, esplika kona ba osan adisional millaun $14 ba Ró Haksolok ne’e  responsabilidade governu nian dunik, atu rezolve problema sira governu anterior nian.

“Politikamente governu assume nia responsabilidade, governu ida uluk halo sala la signifika problema ne’e atu husik monu de’it, ne’ebé governu ida kotuk nia sala ne’e oitavu governu tenke asume hanesan estadu, atu rezolve estadu nia problema. Ne’e la sala”, katak Joaquim.

Pagamentu ba Ró Ahi Haksolok 100% estadu liuhosi Autoridade RAEOA-ZEESM halo tiha ona, maibé to’o oras ne’e Ró refere seidauk mai.

Jornalista: Julio Salinas Soares

Ediór: Mariano Martins

No More Posts Available.

No more pages to load.