CNRT Konsidera Kazu Holarua Ne’e Asaun Hosi Ema Lanu

by -1.254 views
Patrocínio Fernandes dos Reis, Imajen Google

(Reportajen Korespondente Manufahi, Luis Casimiro/Editor Mateus da Cruz)

Dili (Timor Post)– Koordenadór partidu CNRT Munisípiu Manufahi nu’udar mós koordenadór ekipa vitória kandidatura José Ramos Horta ho númeru sorteiu (14), Patrocínio Fernandes dos Reis, konsidera, kazu impede militante CNRT hosi Koordenadór Fretilín, Adriano Cortereal, iha Holarua ne’e asaun ema lanu nian, nune’e laiha influénsia ba CNRT.

“Ida ne’e asaun ema lanu nian, ba ami ida ne’e la iha influénsia ruma tanba ema lanu, baibain ema hemu lanu la’ós iha tempu kampaña maibé ema sempre hemu hodi halo ajeneras hanesan ne’e iha fatin ne’ebé de’it,” dehan, Patrocino ba jornalista iha Eis Merkadu Same, segunda (07/3).

Maski nune’e Patrocínio lamenta ho asaun refere tanba konsidera asaun ne’ebé halo impede aktividades kampaña eleitoral kandidatura ho númeru sorteiu (16) nian.

Konaba-ba liafuan mal ne’ebé koordenadór Fretilin ne’e hasai ba militantes sira iha fatin refere, Patrocínio dehan, liafuan ne’e la merese hasai hosi ema ne’ebé iha ninia integridade.

“Maibé ba ami la hare katak liafuan ne’ebé nia hasai ne’e diriji ba se, talves ema ninia personalidade no integridade hanesan ne’e maibé ba ami la tau sasán refere ba iha problema maibé ami nafatin fokus no konsentra vitória ba ami nia kandidatu”nia hakotu.

Nia parte daudaun ne’e hein katak parte Komisaun Nasionál Eleisaun (CNE) atu asume responsabilidade haree ba fiskalizasaun no observasaun ba aktus ida ne’e tanba atu perturba aktividades kampana eleitoral.

Iha sorin seluk,Komandante Komandu Polisía Munisipiu Manufahi, Superintendente, Joni Viana das Regras, informa, hafoin parte polisia Manufahi halo aproximasaun ho kordenador Fretili, no nia (kordenador Fretilin) rekonese ida ne’e no deklara prontu atu ba hatán.

“Ho akontesementu ne’e ami halo aprosimasaun ba kazu ne’e no koordenador Fretilín Manufahi ne’e rekoñese saida mak nia halo no prontu atu hatán,” dehan, Joni ba jornalista iha nia kna’ar fatin, tersa (08/03).

Entertantu Diretora Komisaun Nasionál Eleisaun (CNE), Melina dos Reis, dehan, CNE fasilita ona formuláriu keixa reklamasaun ba ekipa kandidatura José Ramos Horta hodi ma hatama iha nasionál.

“Ami prepara ona formulariu reklamasaun ba kandidatura atu priense hodi haruka ba nasionál”dehan, Melina.

Nia konsidera asaun ne’ebé akontese iha tempu kampana ne’e situasaun ne’ebé la di’ak maibé desizaun hotu sei hato’o ba nasionál tanba keisa reklamasaun sei hato’o ba Ministeriu Públiku (MP).

Asaun koordenadór Fretilin Munisípiu Manufahi nian ne’ebé haruka militantes partidu CNRT fila tiha hetan preokupasaun hosi públiku

Asaun kordenador Fretilin nian haruka militantes CNRT ne’ebé prepara atu komboiu simu kandidatura José Ramos Horta atu fila tiha hetan preokupasaun hosi publiku hafoin video asaun ne’e viral iha midia sosial. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.