CNRT konsidera Diskursu PR iha 28 Novembru Hanesan fali Prezidente Fretilin

by -105 views

Timor Post (01/12/2020)-Bankada opozisaun CNRT iha uma fukun Parlamentu Nasionál konsidera Presidente-Repúblika Francisco Guterres Lu-Olo, hato’o nia diskursu iha loron proklamasaun independensia 28 Novembru iha Likisa hanesan hato’o fali diskursu Presidente Partidu Fretilin ba militante Fretilin sira.

“Ita konsidera iha loron proklamasaun independensia 28 foin lalais liu ba ne’e Presidente-Repúblika Francisco Guterres Lu-Olo, hato’o nia diskursu hanesan fali diskursu prezidente partidu Fretilin ba militante Fretilin sira,” Vise Prezidente Bankada CNRT, Patrocino Fernandes ba jornalista sira liu hosi konferensia imprensa ne’ebe halao iha sala bankada CNRT, Segunda (30/11).

Patrocino hatete, Deklarasaun Dr. Francisco Guterres Lu-Olo nia promesa katak bainhira eleitu nia sei sai Prezidente ba Povu Tomak ne’e hela ba retórika de’it. Tanba realidade hatudu katak desizaun Presidente-Repúblika nian favorese liu bá nia partidu Fretilin, maski desizaun sira ne’e viola momoos Konstituisaun da RDTL.

Presidente-Repúblika Francisco Guterres fó kulpa ba sidadaun sira seluk maka interpreta Konstituisaun la-tuir dalan loloos. Maibé realidade hatudu katak Presidente-Repúblika nia interpretasaun ba Konstituisaun da RDTL maka halai liubá oinsá fó vantajen no fó benefísiu ba nia partidu Fretilin.

Bankada CNRT hare’e katak Desizaun Presidente-Repúblika ne’ebé nakonu ho tendénsia polítika hodi fó benefísiu ba Fretilin maka hanesan, hahú kedas iha tinan 2017, PR Lú Olo fó-posse ba Primeiru-Ministru Governu Minoritáriu Fretilin, ikus mai Programa VII Governu Minoria chumba iha Parlamentu Nasionál tanba laiha apoiu maioria parlamentár tuir Konstituisaun haruka.

Desizaun Presidente-Repúblika ida ne’e viola Konstituisaun da RDTL Artigu 106 númeru 1 ne’ebé hateten katak: “Primeiru-Ministru hili husi partidu ne’ebé iha votu barak liu ka aliansa partidu sira ne’ebé iha nia ema barak liu iha Parlamentu no iha nomeasaun husi Presidente-Repúblika. Presidente-Repúblika obriga fó pose ba Sekretáriu Jerál Fretilin, Mari Alkatiri sai Primeiru-Ministru maski koligasaun Fretilin-PD laiha maioria Parlamentár, ikus mai VII Governu ne’e monu tanba laiha kbiit atu halo pasa nia programa iha Parlamentu.

Presidente-Repúblika defende an liuhosi diskursu 28 de Novembru 2020 katak Presidente-Repúblika laiha obrigasaun atu aseita Primeiru-Ministru nia demisaun, no argumenta katak tuir loloos Parlamentu Nasionál maka tenke aprova mosaun sensura hasoru Primeiru-Ministru.

Bankada CNRT haree katak argumentu ida ne’e laiha fatin tanba iha 24 de Fevereiru 2020, Primeiru-Ministru Taur Matan Ruak voluntariamente hato’o ona nia demisaun ba Presidente-Repúblika ho razaun katak; Aliansa Mudansa ba Progresu ne’ebé nomea Primeiru-Ministru mate tiha ona. Tuir Konstituisaun da RDTL Artigu 112 númeru 1 alínea (b) hateten momoos katak Governu nia knaar remata bainhira Presidente-Repúblika Simu demisaun husi Primeiru-Ministru.

Bankada CNRT haree katak laiha razaun ba Presidente-Repúblika atu La-Simu Demisaun ne’ebé Primeiru-Ministru voluntrariamente hato’o ona ba Presidente-Repúblika, sá tan Presidente-Repúblika kontinua hein no ezije Aliansa Maioria Parlamentár foun atu halo demisaun ba Primeiru-Ministru ne’ebé voluntariamente rezigna-án tiha ona. Ida ne’e violasaun grave ba Konstituisaun ne’ebé hanaruk krize polítika-konstitusionál iha Timor-Leste.

Francisco Guterres Lu Olo argumenta katak Konstituisaun la fó prazu ba Presidente-Repúblika atu deside kona-ba Primeiru-Ministru nia demisaun, ida ne’e interpretasaun ne’ebé iha liu tendénsia polítika atu fó fatin ba Fretilin integra iha Governu. Tanba realidade hatudu katak Primeiru Ministru Taur Matan Ruak hato’o nia demisaun ba Presidente-Repúblika, Prezidente rasik maka foti inisiativa halo reuniaun ho partidu sira ho asentu parlamentár atu buka malu hodi forma governu foun, ka IX Governu Konstitusionál.

Husi inisiativa Presidente Repúblika nian ne’e konsege mosu Aliansa Maioria Parlamentár foun kompostu husi CNRT-KHUNTO-PD-FM/UDT-PUDD ho kadeira 34 ne’ebé Nomea Maun Bot Kay Rala Xanana Gusmao ba Primeiru Ministru. Maibé Presidente-Repúblika Ignora tiha de’it Aliansa Maioria Parlamentár foun ne’ebé kumpre ona Konstituisaun RDTL Artigu 106 númeru 1.

Desizaun Prezidente nian ignora Aliansa Maioria Parlamentár foun ne’e grave Violasaun ba Konstituisaun RDTL Artigu 106 númeru 1.

Presidente-Repúblika Dr. Francisco Guterres Lu Olo argumenta iha nia diskursu ba Estadu katak Laiha Aprovasaun ba Orsamentu Jerál 2020 ne’e la-signifika katak iha Krize Institusionál Grave.

Bankada CNRT nota katak deklarasaun ida ne’e hatudu Presidente-Repúblika maka Permite atu Estadu Timor-Leste la’o de’it ho Dotasaun Orsamentu Temporáriu ka duodecimo ne’ebé prejudika povu Timor-Leste nia moris no impede dezenvolvimentu nasionál.
Presidente Repúblika nia interpretasaun erradu ne’e maka viola tiha Konstituisaun da RDTL Artigu 86 alínea (f) katak Presidente Repúblika “Hakotu Parlamentu Nasionál, iha kazu krize boot institusionál nian ne’ebé labele iha formasaun governu ka Aprovasaun Orsamentu Jerál Estadu nian, iha tempu naruk liu loron neen-nulu,” Patrocino haktuir.

Nia afirma Presidente Repúblika la foti desizaun hodi ikus mai Estadu Timor-Leste tenke la’o de’it ho orsamentu duodecimo durante fulan 9, ne’ebé Presidente-Repúblika la-hare ka la-konsidera nu’udár krize institusionál grave, tanba Presidente-Repúblika nia interpretasaun katak eziste Krize Konstitusionál ne’e so bainhira Fretilin la-ukun ka lakon nia governasaun.

Presidente-Repúblika konsidera katak Hahalok Fretilin-PLP-KHUNTO ne’ebé hadau meza parlamentu nasionál ne’e la-ós krize institusionál grave, maski Bankada CNRT hare’e katak hahalok Asaltu Podér iha Parlamentu Nasionál ne’e viola Konstituisaun Artigu 99 númeru 3, Lei Organizasaun Administrasaun Funsionamentu Parlamentu (LOFAP) artigu 7, no rejimentu parlamentu nasionál artigu 16 ho 22.

Bankada CNRT konsidera katak Presidente-Repúblika Permite Violasaun Konstituisaun da RDTL sira ne’e ho objetivu atu fó dalan ba Fretilin tama ba Governu, maski aktu sira ne’e Inkonstitusionál.

Hare’e husi lala’ok hirak ne’e, Bankada CNRT konklui katak Presidente Repúblika Dr. Francisco Guteres Lú Olo mak hun no abut loloos ba violasaun Konstituisaun, povu tomak komesa komprende situasaun ida ne’e ho didi’ak apenas Presidente sei buka atu aproveita nafatin momentu solene estadu nian hodi halo defeza de onra no soe fali kulpa ba iha Partidu CNRT no Maun Bot Kay Rala Xanana Gusmão.

Presidente Repúblika para ona ho káre rai rahun ba povu ninia matan, povu hatene momoos sé mak viola Konstituisaun-da-Repúblika durante ne’e. Presidente-Repúblika nia defeza da onra no argumentu sira hodi defende-án liuhosi diskursu ba Estadu iha 28 de Novembru 2020 ne’e laiha valor tanba povu tomak rona rasik ona deklarasaun Sekretáriu Jerál Fretilin Dr. Mari Alkatiri ne’ebé hateten katak “Fretilin ko’a dalan Konstituisaun nian hodi sai ai-tongka ba VIII Governu tanba Konstitusionalmente Maun Bot Kay Rala Xanana Gusmao lais liu no aprezenta tiha ona lista IX Governu nian ba Presidente Repúblika,” deklara Patrocino.

Atu termina, Bankada CNRT husu ba povu tomak atu iha Eleisaun Prezidensiál 2022 eskoilha pesóa ida ne’ebé defende ita-nia Konstituisaun no halo tuir de’it prinsípius Estadu de Direitu Demokrátiku.(Jornalista : Julio Salinas Soares)

No More Posts Available.

No more pages to load.