CNRT Kestiona Polítika Oitavu Governu

by -219 views
Foto Google

KELIKAI (Timor Post) -Partidu Congresu Nasionál Rekonstrusaun de Timor (CNRT) konsidera iha mandatu oitavu governu konstitusionál, povu susar tebes atu hetan osan maibé kompara ho governasaun ne’ebé lidera husi Kay Rala Xanana Gusmão.

Kestaun ne’e hato’o husi deputada CNRT, Veneranda Lemos hafoin hasoru malu ho grupu soru tais, hakiak animal no kuda produtu hortikultura iha suku Lakoliu, postu administrativu Kelikai, munisípiu Baukau.

Veneranda hato’o kestaun ne’e tanba grupu hirak ne’e hapara sira ninia atividade grupu nian ho razaun governu implementa estadu emerjénsia no konfinamentu obrigatóriu mak hapara sira nia movimentu produs no fa’an nian.

Nia afirma, hanesan reprezentante povu iha uma fukun Parlamentu Nasionál, sente triste hafoin simu lamentasaun husi grupu hirak ne’e. maibé tuir loloos responsabilidade oitavu governu nian atu haree problema ne’ebé mak komunidade sira enfrenta.

“Komesa kedas husi tinan 2017 to’o mai agora se mak hetan konsekuénsia liuhusi impase polítika, povu tanba ne’e mak bainhira rona tiha grupu ne’e nia lamentasaun ha’u hanesan Timoroan inklui militante no kuadru polítiku partidu CNRT sente preokupadu no sente triste tanba dezenvolvimentu la to’o ona iha baze no pior liu atu hetan osan sentavu lima nulu ne’e difisil”, hatete Veneranda ba Timor Post iha suku Lakoliu-Kelikai, Domingu (01/08).

Iha tempu hanesan, responsavel grupu Hadomi Kultura iha suku Lakoliu, Jeralda Pereira Ximenes, hatete grupu ne’e harii dezde tinan sanulu ba kotuk ho objetivu atu ajuda governu loke kampu servisu ba an rasik no ba feto sira iha baze, maibé hahú iha 2018 mai oin susar tebes hetan rendimentu pior liu tan iha tinan ida ne’e buat hotu paradu.

“Ami harii grupu ne’e tinan barak ona ho intensaun ajuda ita nia governu no estadu kria rasik kampu servisu ba ami nia an, maibé ho impase polítika no tama tan estadu emerjénsia ami labele book an ba mai,” hatutan nia.

Inan feton ne’e husu ba governu buka dalan oinsá bele normaliza fali situasaun hanesan uluk nune’e bele fa’an sira ninia produtu tais hodi hetan osan para sosa nesesidade uma laran nian.

Entretantu, xefe aldeia Mokobubu, suku Lakoliu, Cesário Moreira Freitas hatete daudaun ne’e populasaun iha aldeia refere labele hala’o sira nia atividade hortikultura, tanba mini irrigasaun ne’ebé halo husi kompañia lokál balun labele finaliza projetu ne’e inklui debit bee menus entaun bee la sulin tuir kanu mini irrigasaun ne’e.

Tuir observasaun jornalista Timor Post nian iha aldeia Mokububu, suku Lakoliu, susar tebes transporte públiku hanesan mikrolete, mini anguna atu asesu tanba kondisaun estrada la di’ak, hahú kedas husi postu Kelikai vila.(gut)

 

No More Posts Available.

No more pages to load.