CNE-STAE Rona Perspetiva Eleisaun Prezidensiál 2022

by -431 views
Prezidente CNE, Jose Belo, Foto TP/Caetano Guterres

Prezidente CNE, Jose Belo, Foto TP/Caetano Guterres
BAUKAU (Timor Post)-Komisaun Nasionál Eleisaun no Sekretariadu Tékniku Administrasaun Eleitorál enkontru atu rona autoridade sivíl no militár nia perspetiva molok hodi susesu ba kampaña no eleisaun prezidensiál tinan 2022.

“Objetivu ami órgaun eleitorál rua mai enkontru ho ita nia entidade sira atu bele rona sira nia espetativa kona bá oinsá mak eleisaun prezidensiál tinan oin mai la’o di’ak no kondisaun saida mak ita tenke hadi’a molok tama eleisaun”, dehan presidente CNE Jose Belo ba Timor Post Tersa feira (5/10) iha salaun apuramentu munisípiu.

Aleinde ne’e, CNE liuhosi komisáriu destakadu fahe mós informasaun kona ba aliterasaun lei eleisaun prezidensiál nian iha órgaun eleitorál ba entidade.

Iha tempu hanesan, diretór nasionál STAE, Acilino Branco husu ba entidade Baukau koopera, no partidus politikus (Parpol) fiskaliza militantes sira iha baze molok tama ba kampaña no eleisaun.

Atividade hanesan CNE-STAE halo ona iha nivel nasionál halo koordenasaun ho pontu fokal partidu polítika nian.

Iha nivel munisípiu nian STAE iha funsionáriu kolokadu iha postu administrative hamutuk ho CNE halo supervizaun nune’e garantia festa demokrasia ida ne’ebé maka povu nian para ejerse sira nia direitu votu ho di’ak.

Prezidente autoridade munisípiu Baukau Olívio Freitas husu ba órgaun eleitorál rua kontinua akompaña partidu polítiku fó hanoin ba ninia militante sira partisipa iha votasaun ho di’ak.

Atividade ne’e partisipa husi entidade sivíl no militár, veteranu konviksaun relijiozu no relijioza no autoridade seluk iha munisípiu Baukau. (gut)

No More Posts Available.

No more pages to load.