CNE-STAE Pro Kontra Realiza Eleisaun iha Austrália

by -341 views
Sidadaun ida fo hela nia votus, Imajen Esp

(Reportajen Jose Mauno/Editor Mateus da Cruz)

DILI—Komisaun Nasionál Eleisaun (CNE sigla portugés) no Sekretariadu Tékniku Administrasaun Eleitorál (STAE), pro kontra realiza eleisaun prezidensial periodu 2022-2027 iha Australia, CNE la konkorda realiza eleisaun iha Austrália tanba laiha resenseamentu eleitorál enkuantu STAE hakarak realiza eleisaun tanba bazeia ba númeru eleitór tinan kotuk.

“STAE kontinua halo preparasaun tanba se mak iha kompeténsia administra no mós implementa aktu eleitorál TL maka STAE,” DJ STAE, Acilino Manuel Branco, hatete ba jornalista sira iha nia knaar fatin Kaikoli sesta (04/03).

Nia dehan, TL iha órgaun eleitorál rua hanesan STAE mak administra eleitorál no superviziona mak CNE, entaun STAE halo preparasaun tanba bulletin de votu ba rai li’ur inklui Australia mós imprime hotu ona.

STAE mós publika tiha ona naran sentru votasaun sira iha rai li’ur inklui Austrália, kondisaun Australia prienxe rekizitu mínimu ne’ebé mak lei hatete katak basta 50 eleitór resenseadu bele funsiona sentru votasaun ida.

“Agora dadus ne’ebé mak STAE públika hamutuk 1478, sera ké ida ne’e ita ignora sira nia direitu,” nia kestiona.

Entaun STAE mai ho prinsípiu ida katak STAE hanesan órgaun ida ne’ebé implementa prosesu eleitorál iha Timor no atu garante sidadaun hotu nia direitu. Entaun kona-ba kooperasaun STAE ho CNE, kontinua hala’o ida-idak ninia funsaun.

Iha fatin hanesan prezidente CNE, Jose Agostinho da Costa Belo Pereira, hatete  CNE hasai ona deliberasaun ida no asina unanimidade liu husi plenáriu depois mak CNE inisiativa halo karta ba tribunal rekursu.

“Ita hotu hatene iha konstituisaun artigu 65 númeru 2 katak, resenseamentu ne’e obrigatóriu no atualizasaun kada tinan iha eleisaun. Tanba la akontese atualizasaun base de dadus iha Australia entaun CNE ninia pozisaun katak husu ba STAE para labele halo eleisaun iha Australia,” nia hatete.

Maibé ida ne’e la taka dalan, tanba desizaun sai ona iha jornál da repúblika entaun kandidatura sira la konkorda ho desizaun CNE maka iha dalan di’ak liu bele hato’o keixa ba Tribunal.

“Ha’u husu ba kandidatura sira atu kompriende, respeita mós orden sira ne’e para servisu asegura ho di’ak,” nia haktuir. (Lee notisia seluk iha jornal Timor Post/asesu youtube Timor Post)

No More Posts Available.

No more pages to load.