CNE Entrega Ona Rezultadu Apuramentu Nasional ba Tribunal Rekursu

by -536 views
Komisariu CNE sira koa’lia hela ho prezidente Tribunal Rekursu iha sala audiénsia TR, hafoin entrega rezultadu apuramentu nasionál, Segunda ne’e. Imajen Midia CNE

(Reportajen Estaziádu Mariano Abi/Editor Mateus da Cruz)

Dili (Timor Post) –Hafoin durante oras 24 nia laran CNE hein reklamasaun kona-ba rezultadu provizoriu ne’ebe CNE anúnsiu, maibé tanba laiha reklamasaun ruma nune’e ohin (28/3), CNE entrega ona rezultadu apuramentu nasional ba iha Tribunal Rekursu hodi pronunsia no halo validasaun.

CNE aprezenta ba Tribunal Rekursu Akta Apuramentu Munsipiu, Rejiaun, Diáspora no Akta Apuramentu Nasional nian ne’ebe hamutuk iha urna ida, simu direta hosi Presidente Tribunal Rekursu, Deolindo dos Santos.

“Tuir tempu legál ne’e, durante 24 horás komu to’o ohin tuku 5 ne’e, laiha kontesta ruma, laiha reklamasaun ruma ami remete ba Tribunál Rekursu tuir lei haruka,” hatete Prezidente CNE,  José Belo ba jornalista sira hafoin  intrega  rezultadu  eleisaun  Prezidensiál ba Tribunál Rekursu iha kaikoli, Dili, segunda (28/03).nia argumenta

Nia hatete, hafoin entrega ba tribunal rekursu, tribunal rekursu lei iha oras 72 ou bele lais liu, depende ba tribunal nia servisu, sei foti desizaun.

“Sim, tuir lei 72 horás bele lais liu, bele to’o, depende Tribunal Rekursu nia servisu ne’e, ami  nia servisu hotu ona, ami entrega hotu ona, ami hein de’it desijiaun,”nia dehan.

Entretantu Tribunal Rekursu sei anunsiu ofisialmente kandidatu nain rua ne’ebe sei avansa hikas ba segunda volta, iha loron 1 fulan Abril, aumesmu tempu halo kedas sorteiu ba kandidatu nain rua ba numeru ordem buletim votu nian.

Tuir kalendariu eleitoral nian katak kampanha eleitoral ba segunda volta nian sei realiza mos iha loron 2 to’o loron 16 fulan Abril tinan ne’e.

Entretantu hatan Kona-ba desizaun ba eleisaun segunda volta, prezidente CNE ne’e haktuir, nia laiha kompeténsia foti desizaun kona-ba ida ne’e, tanba desizaun ida ne’e iha tribunal rekursu nia liman, CNE so hasai de’it rezultadu provizóriu hosi apuramentu nasionál.

“Sim ne’e kompetensia Tribunal nian, Ami hasai de’it rezultadu provizoriu,” nia hakotu.

Durante CNE halo apuramentu nasionál deside rejeitadu 5, válidu 4.687, branku 67, nulu 8.386 no totál votu válidu ba kadidatura 16 hamutuk 651,859.

Entretantu, hosi apuramentu final nebe CNE halo,  José Ramos Horta hetan votu hamutuk 303.477 (46,6%), Francisco Guterres ‘Lú Olo’ 144.282 (22,1%), Armanda Berta dos Santos 56.690 (8,7%), Tito da Costa Cristóvão Lere Anan Timur 49.314 (7,6%), Mariano Assanami Lopes Sabino 47.334 (7,3%), Anacleto Bento 13.205 (2,0%).

Tuir fali, kandidatu Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Fereira 4.219 (0,6%), Felisberto Araújo Duarte 2.709 (0,4%).

Constâncio da Conçeicão Pinto ‘Terus’ 2.520 (0,4%), Rogério Tiago de Fátima Lobato 2.050 (0,3%), Virgílio da Silva Guterres ‘Lamukan’ 1.720 (0,3%), Antero Bendito da Silva 1.562 (0,2%) no Maria Ângela Freitas da Silva 711 (0,1%).(Asesu Notisia Seluk Iha Jornal Timor Post/ Asesu You Tube Timor Post)

 

 

No More Posts Available.

No more pages to load.