Cidália Apresia Kreatividade Joven

by -45 views
Cidália Lopes Nobre Mouzinho Guterres

DILI (Timor Post) —Espoza Prezidente Repúblika Francisco Guterres Lu Olo, Cidália Nobre Mouzinho Guterres orgullu no apresia ho kreatividade joven balun hodi transforma natureza ninia furak sai fatin turismu ne’ebe atrativu.

Maski hasoru hela situasaun difisil pandemia Covid-19, maibé joven sira ne’e nafatin hatudu sira nia kreativu, hafanu juventude sira seluk hodi halo mós atividade pozitivu seluk ne’ebé aleinde benefisia ba públiku, mós ba aan rasik.

“Ha’u nota ho orgullu, maski ho situasaun pandemia, joven sira esplora sira nia kreatividade hodi hamosu inisiativa ne’ebé furak, transforma natureza ninia furak hodi sai fatin turizmu,” nia hatete iha salaun Bebora, Tersa (20/07).

Iha fatin lubun mak joven kreativu sira transforma natureza nia furak sai fatin turistiku.

“Hanesan iha Dare, Hera, iha Beto tasi, iha Lagoa Maubara, iha Lospalos no fatin seluk tan, inisiativa sira ne’e bele transforma sosiedade sira ninia mentalidade no tulun fó rendimentu maski sei ki’ik tebes. Tebes duni bainhira ita hetan susar mak ita nia hanoin buras liu tan, hodi halo di’ak ba ita nia moris rasik,” Cidália apresia.

Aleinde ne’e, nia mós apresia tanba iha juventude barak mak hahú preokupa ona ba saúde planeta nian, joven barak mak hahú fó atensaun ba meiu ambiente.

Cidália fó ezemplu, iha Hera, juventude barak kuda ai parapa no komesa buras, no kuda ai oan iha fatin-fatin hodi próteje rai no konserva bee.

“Iha parte Hera nian tesik ba, ita haree ai-parapa komesa buras, nune’e mós iha fatin seluk tan kuda ai-oan hodi proteje rai,” nia hakotu. (ven)

No More Posts Available.

No more pages to load.