CESTA BASIKA RISKU BOOT BA KORRUPSAUN

by -505 views

Rosário S. Araújo                     

Pandemia covid-19 (corona virus disease) ne’ebé afeta ona mundu tomak kuaze besik tinan ida ona ladauk iha sinais ruma atu remata, aleim de fó ameazas ba vida humana no saude mundial tomak, pandemia ida né afeta  ba aspetu ekonomia, edukasaun, sosial, atividade relijiaun nian, husi kauza hirak né hotu aspetu ekonomia  sai alvu ida mak afeta tebes hosi pandemia ida né, tamba né setór ekonomia hetan prioridade únika, tamba ema barak lakon servisu, lakon edukasaun, fila liman sira iha merkadu la hetan rendimentu, setór privadu barak mak kesi sintu no lulun biti, empregadu barak hasai husi servisu, joven barak laiha servisu, kiak hahu aumenta iha dalan sira Dili laran no munisipiu, katuas ferik barak la hetan atensaun, ema moras mentalidade barak la hetan atensaun espesial no laiha atendimentu ba sira, labarik barak moris faan deit manu tolun, modo tahan no seluk tan iha merkadu, labarik barak mal nutrisaun,  loja no movimentu kompradores sira menus, aspetu hirak né halo lider nasional sira hanesan Xanana Gusmao, Ramos Horta no autoridade Governu mos prekupa hodi buka dalan oinsa fó apoiu sosial ou cesta básika ba ema hirak mak infrenta afetadu  né, hodi halo kma’an sira nia ekonomia uma laran.

Maioria Deputadu sira iha Parlamentu Nasionál aprova ona OJE 2020 no 2021 nian, ne’ebé Xefe Governu, durante ninia intervensaun iha aprezentasaun dokumentu nian, hanaran ho “orsamentu Rezisténsia no Reziliénsia nian” no “Esperansa nian iha Retoma no iha Rekuperasaun”, iha montante totál dolar amerikanu millaun 1,497.

Primeiru Ministru tau nia esperansa boot  atu membru Governu sira bainhira halao ezekusaun tenke ho rigór no prudente atu labele hamosu iregularidades hodi fó prejuizu ba Estadu,  tau osan ida né atu fo apoiu ba prekupasaun ne’ebé nasaun infrenta dadaun,Iha tinan ne’ebé mosu mós pandemia COVID-19, reflete mós iha OJE ba 2020, resposta Governu nian ba efeitu negativu sira husi COVID-19 nian, tantu iha nivel impaktu ba saúde nune mós ba ekonomia. Hafoin programa estabilizasaun ekonómika no sosiál, ne’ebé hahú kedas hafoin surtu dahuluk krize né nian, ne’ebé kompostu husi medida konkreta sanulu-resin-sia, agora prioridade sei fó fali ba implementasaun medida sira prazu-badak nian, ne’ebé tau ona iha Planu Rekuperasaun Ekonómika, hanesan:

Bote ai-han (Cesta Básica), hodi tulun família sira atu hatán ba sira-nia nesesidade bázika sira, maibé iha tempu hanesan promove mós produsaun no konsumu produtu ai-han nian sira ne’ebé timoroan prodús, hodi kontribui ba objetivu sira kona-ba kriasaun empregu, apoiu ba empriendedorizmu, autoempregu, inovasaun, inisiativa privada, komunitária no kooperativa;

Cesta Básica (bote aihan) hahu lao daudaun ona iha teritório laran maibe ladauk iha sinais ruma mak hatudu katak ida né meiu ida hodi promove produtos lokais ne’ebe timor oan rasik produs, kriasaun empregu ladauk mosu mesmu hanoin ida né mos tau nudar planu ida iha prioridade projetu cesta basica ida né, kuaze barak liu fo benefisiu ba kumpania privada sira ho meiu ajudikasaun direita ne mos kumpania balun deit laos kumpania hotu, iha biban balun hamosu desintendimentu entre kumpania empresario sira tamba tendensia favoritismu nebe tau atensaun espesial liu ba kumpania sira mak tenke kunese diak tamba asuntu espesial no politiku nian, iha momentu hirak né valorizasaun ba hasae ekonomia nasaun hela nudar retorika deit, iha situasaun riskante hirak né presiza boa vontade polítiku sira nian tau kontrolu iha asuntu sira mak liga ba  ajudikasaun direita  nebe tenke hases husi risku favoritismu nian, se nuné ita tenke prekupa saida los mak cesta basica nia objetivu ba povu iha momentu difisil ida né ?

Medidasira ba retoma ekonomia nianho atribuisaun subsídiu sira atu tulun entidade empregadór no emprezáriu individuál sira, ho atensaun espesiál ba setór estratéjiku importante Turizmu nian, setór ida-ne’ebé afetadu liu husi krize né, hanoin briliante tebes iha retoma ekonomia nian maibe ladauk tau iha prátika atribuisaun projetu, lolos Governu tenke tau planu ida ke mais estratéjiku atu konsetu retoma ekonomia ne’ebe sei responsabiliza husi kumpania sira bele muda ekonomia nasaun nian ba periodu fulan hira ka tinan tuir mai, ida ne’e la klaru, karik mos hadia no promove setor ekonomia tenke prova katak kumpania sira iha estratejia atu hamoris setor produtivu sira tuir periodu akordu ho Governu atu nuné osan ka subsidio ne’ebé kumpania sira hetan fasil halo kontrolu ba ezekusaun nebe transparente iha fiskalizasaun no monitorizasaun ba rezultadu hasae produtu sira, ida ne’e mak objetivu lolos hamoris ekonomia nasaun iha tempu kurtu.

Medidasira ba Dispensa Kontributivahodi la kobra reseita sira kona-ba impostu, taxa ka renda husi empreza sira, iha momentu ne’ebé sira hasoru prejuízu no lakon rendimentu;

Governu nudar orgaun ezekutivu ida mak iha papel tomak atu halo kontrolu no monitoriza ba mákina dezenvolvimentu nasaun nian, laos kestaun selu ka free selu impostu no taxa ka renda husi empreza sira maibe tenke tau iha kontratu servisu hodi simu responsabilidade atu hamoris fila fali ekonomia nasaun nian, nuné tó momentu ida ekonomia nasaun hahu lao diak ona kumpania tenke fila fali halo nia obrigasaun normal nudar sidadaun diak ba nasaun, kontributu hirak ne’e labele fahe deit sein justifikasaun ida mak klaru iha kontratu servisu sei fo’o prejuizu boot ba planu estadu nian hodi fortifika ekonomia nasaun, Governu investe daudaun ba kumpania sira maibe kumpania sira mos tenke promete atu lori fila fali ekonomia povu no nasaun nia ba situasaun normal hodi loke kampo trabalho, hamoris setór pekuaria, setores produtivu sira, setores investimentu sira iha rai laran, nune deit mak sei  bele presta planu Governu nian nebe diak, moos no tranparente atu labele hamosu diskunfiansa publiku nian ba boas prestasaun ne’ebe Governu implementa daudaun.

Medida sira ba apoiu ba Traballadór Informál sirahodi motiva sira atu rejista an iha rejime seguransa sosiál nian oin-oin ne’ebé eziste, nune’e bele kontribui ba inkluzaun no redusaun pezu ekonomia informál nian iha ita-nia sosiedade, nune’e mós atu aumenta universu asaun nian husi ita-nia sistema protesaun sosiál nian.

Pandemia covid nudar krize mundial ida nebe afetadu tebes ba vida ekonomia global mundu nian, ita rasik laiha serteza bainhira loos mak surtu pandemia atu hotu, bainhira loos mak kumpania sira hahu loke kampo trabalho boot ba trabalhador sira bele servisu normal fila fali atu kontribui ba asuntu hotu inklui seguransa sosial, trabalhadores sira lakon servisu husi kumpania tamba kumpania tenke hamenus nia trabalhadores sira, entaun saida mak Governu tenke motiva atu ekonomia hamrik normal fali mak tulun promove kumpania sira atu sai boot liu husi apoiu totalmente hadia nia mekanismu no jestaun finanseira sira, rekrutamentu sira no seluk tan, nuné ema ida-idak rasik sei konsiente hodi kontribui rejista ba seguransa sosial.

Leitores hau toma nota iha projetu cesta basica ida ne’e mak ajudus aihan no nesedade basica ba ema hotu iha Timor laran tomak,signifika hahu husi Presidente da Republika to mai populasaun baibain sei hetan benefisiu husi cesta basica ida ne’e, Governu tau konsetu ida ke mais luan liu hodi haluha define didiak apoiu emerjensia hirak hanesan ne’e merese ba se loos? ema kiak, ka riku sira, ka Funsionario Estadu sira, membru Governu ou deputadus, emprezaris sira, grupu kategorias sira no seluk tan.

Hau nia pensamentu katak projetu cesta basica ida ne’e la hatudu nia modelu diak iha boa vontade liu-liu ba orgaun kompetente sira mak ezekuta programa ida ne’e nia seriedade ba reduz kiak no hamoris ekonomia nasaun iha konsetu ida mak profunda, oinsa programa ajuda kiak sira tamba infrenta hamlara iha surtu covid 19 ne’e tenke ba ema hotu, seráke ema hotu kiak no la iha aihan ou hamlaha? Oinsa funsionario sira simu salario fulan fulan tenke simu mos cesta basica? Governu tenke poupa osan atu investe ba edukasaun saude, agricultura no nesedade sira seluk duke hasai kustu boot ke la razoavel, Govenante sira tenke hanoin nasaun nia vida ba tempu naruk,laos tenke fahe cesta basica ba ema hotu atu nuné hetan apresiasaun diak husi publiku, konsetu sira tenke estratejiku hodi demanda estadu nia objetivu lori nasaun ba tinan naruk ida ne’e make mak hotu nia mehi.

Projetu ida ne’e laos autoridade sira atu  festeisa, maibe tenke nafatin iha kontrolu ba ezekusaun orsamentu, aleim de cesta basica ida ne’e sei iha mos kustu ba perdiem no kustu seluk ba viajen governantes no teknika inklui asesor no gabinete sira ba munisipiu hodi halo lansamentu, leitores ita hotu la duvida ho programa saida deit mak governu hakarak halo hodi ajuda no apoiu povu iha situasaun surtu covid ide nee, tamba ne’e ita hotu nia papel mak tenke kontrolu no relata ba entidade kompetente sira wainhira ita hetan indisius ruma nebe liga ba iregularidade gastus no ezekusaun sira mak  la razoavel, ida ne’e nudar meiu ida hodi apoiu governu bele halo avaliasaun iha prosesu ezekusaun hotu, tenke iha mekanismu kontrolu internu husi entidade publiku sira seluk atu asegura katak implementasaun lei sira tuir dalan nebe rigor, papel importante ida mak tenke enkoraja empresario nasional sira atu servi ho seriedade no labele viola lei nebe ikus mai sei hatan iha lei nia oin tamba kestaun administrativu no tekniku sira nebe bele potensia lori ba kriminalizasaun ba korrupsaun.Leosae,17 Fev.21.

Opiniaun rasik  no pesoal :

               Hakerek nain servisu iha CAC

              Karik iha hanoin ruma bele kontaktu ba

              Hp:+ 670  7732 6592

              Email: [email protected]

No More Posts Available.

No more pages to load.