Cedelizia: “Loron 18-19 Maiu 2020, Tempu Arão Noé Nian”

by -111 views

Timor Post (24/11/2020)-Sekretaria Jerál Parlamentu Nasionál sesante, Cedelizia Faria dos Santos hatete, desizaun ne’ebé Prezidente Parlamentu Nasionál, Aniceto Guterres, foti hodi halo ezonerasaun ne’e la justu.

“Ba ha’u hanoin razaun sira ne’ebé foti hodi halo ezonerasaun mai ha’u ne’e la justu”, Cedeliza afirma ba jornalista sira iha Parlamentu Nasionál Tersa (24/11).
Cedeliza konsidera la justu tanba razaun nia la fasilita prosesu plenária iha loron 18-19 fulan Maiu 2020 ida ne’e akontese iha tempu Prezidente Parlamentu Nasionál sesante Arao de Jesus Amaral nian.

“La justu tanba iha momentu loron 18 no 19 Prezidente parlamentu sesante Arão Noé nia tempu, baibain atu halo plenária ne’e bainhira ajenda hosi prezidente parlamentu rasik mak sekretaria jerál bele halo. Tanba sekretaria jerál nia podér la jere to’o plenária”, subliña.

Razaun seluk prezidente uza hodi substitui maka hamate ahi eletrisidade, maibé Faria dehan eletrisidade ne’e EDTL maka hare.

“Ne’ebé ha’u hanoin katak razaun sira ne’e la justu”, tenik tan.

Administrativamente sekretaria jerál parlamentu esplika nia labele simu notifikasaun ohin sai kedas ne’e la los tanba nia la halo krime.

“Administrativu ha’u mos labele notifikasaun agora hodi sai kedas”, reafirma Cedeliza hodi dehan sei levanta desizaun ne’e ba tetu iha tribunal.

“Ita nia konstituisaun mós fó dalan ba sidadaun ida hanesan ema Timor oan, hanesan juventude ida mai mós hosi família jerasaun ne’ebé mak funda mós nasaun ida ne’e no hanesan sobrevivente ‘Masakre’ 12 (Novembru) lia loos ha’u tenke defende”, rekere nia.

Destitui bazeia Ba Lei
Prezidente Parlamentu Nasionál, Aniceto Longuinhos Guterres Lopes, iha loron, 24 Novembru 020 Liuhosi despaxu númeru 30/2020/PPN, halo destituisaun ba Sekretária-Jerál Parlamentu Nasionál, Cedeliízia Faria dos Santos.

Tuir karta komunikadu imprensa ne’ebé jornalista Timor Post asesu liu hosi Gabinete Prezidente Parlamentu hatete, Prezidente Parlamentu Nasionál halo destituisaun ne’e bazeia ba nú. 3 artigu 23, Lei nú. 12/2017, 24 Maiu, ne’ebé hateten katak Sekretáriu-Jerál bele destituidu tanba justa kauza.

De faktu iha duni Justa kauza mak justifika Prezidente foti desizaun ida ne’e, iha ámbitu violasaun ba Lei Organizasaun no Funsionamentu Administrasaun Parlamentár, viola Rejimentu Parlamentu Nasionál artigu 85. Faktus seluk mak hanesan tuir mai ne e:

Dahuluk, Sekretária-Jerál hatudu abuzu ba nia funsaun sira ká halo intervensaun ba kompeténsia Gabinete Seguransa nian ne’ebé tutela direta ba Prezidente Parlamentu Nasionál.

Daruak, Sekretária-Jerál la dezempeña nia funsaun koordenasaun servisu regular ho Prezidente Parlamentu Nasionál ne’ebé mós nu’udar Prezidente ba Konsellu Administrasaun.

Datoluk, Sekretária-Jerál Parlamentu Nasionál liu-husi nia despaxu iha loron, 15 Maiu 2020, fó instrusaun ba funsionáriu Parlamentu Nasionál, hodi boikota funsionamentu normál plenária, liu-Iiu orienta hodi halo paralizasaun ba sistema sonoru no apoiu seluk ba plenária iha loron, 18 no 19 Maiu 2020.

Dahaat, Sekretária-Jerál Parlamentu Nasionál, la-obedese ba orientasaun superiór, demonstra la iha responsabilidade durante enerjia elétrika avaria, inklui mákina fotokopiadora, ár kondisionadu no abastesimentu ba bee iha Parlamentu Nasionál.

Hafoin halo destituisaun ba Sekretária-Jerál Parlamentu Nasionál Sra. Cedelizia Faria dos Santos, Prezidente Parlamentu Nasionál Dr. Aniceto Longuinhos Guterres Lopes, halo kedas despaxu nú.31/2020/V/PPN hodi nomeia Señor Adelino Afonso de Jesus, Tékniku Superiór Parlamentár Asistente, eskalaun 3 husi kuadru permanente funsionáriu Sekretariadu Jerál Parlamentu Nasionál no iha tempu badak sei entrega kargu husi Sekretária-Jerál sesante ba Sekretáriu-Jerál foun.(Jornalista : Julio Salinas Soares)

No More Posts Available.

No more pages to load.