CARE Apoiu Uma Ba Familia Afetadu Inundasaun

husi -252 views
Peter Goodfellow, Diretór Nasionál CARE Internásional, (karuk), Embaixadór Uniaun Europeia ba Timor-Leste, Andrew Jacobs ho Direitór Jeral Protesaun Sivil, Isamil Babo.Foto TP/Esp

DILI (Timor Post) – Organizasaun CARE International iha Timor-Leste , sei apoia Governu atu fornese uma ba família sira ne ‘ebé afetadu husi inundasaun iha fulan Abríl liubá iha Timor-Leste, liuhusi apoiu finanseiru €100,000 ba asisténsia téknika husi Uniaun Europeia.

Iha komunikadu imprensa ne’ebé Timo Post asesu, Segunda (14/06) hosi Uniaun Europeia informa, Inundasaun iha fulan Abril sai maka’as liu iha tinan 50 nia laran. Surtu ho kazu sira Covid-19 nian no esforsu atu hapara propagasaun ne’e obriga ona ema vulnerável sira iha Dili, no iha Timor-Leste laran tomak, ba situasaun sira ne’ebé la seguru liu tanba sira koko atu buka servisu, mantein ijiéne no prátika distansiamentu nian. CARE suporta família sira ne’ebé hetan ona impaktu hosi inundasaun iha fulan Abril liubá liuhosi servisu hamutuk ho Governu Timor-Leste atu fornese apoiu abrigu tékniku ba pelumenus umakain 200 iha Dili.

Apoiu tékniku abrigu nian ne’e inklui hasa’e konxiénsia kona-ba oinsá harii uma ne’ebé seguru, garante inkluzaun feto, labarik feto, no ema ho defisiénsia sira. Ida ne’e asegura katak ema hotu-hotu ne’ebé presiza uma mahon sei rona iha prosesu foti desizaun, no sei foka liu ba identifika no aumenta sira-nia partisipasaun iha prosesu foti desizaun umanitária ba futuru.

CARE sei uza revista Lafaek atu ba to’o uma kain 103.000 iha area rural no remota sira, no CARE nia Facebook atu atinji ema liu 137,000 iha area urbana sira. Iha total, CARE sei kobre ema rihun ba rihun ho informasaun kona-ba konstrusaun uma mahon.

Peter Goodfellow, Diretór Nasionál CARE Internásional, dehan: “Ami kompromete ona atu fó apoiu ba Sekretaria Estadu Protesaun Sivil hodi garante katak família vulnerável sira ne’ebé afetadu hosi inundasaun bele fila-fali ba uma ho seguru. Familia barak mak sei iha risku ba bee sa’e iha futuru no rai-halai, no ami sente orgullu hodi servisu hamutuk ho Uniaun Europeia hodi hamenus vulnerabilidade família sira nian ba dezastre sira iha futuru liuhusi téknika konstrusaun ne’ebé di’ak liu ba reziliénsia uma sira nian. Feto no labarik sira iha probabilidade boot liu dala 14 duké mane sira ne’ebé mate iha situasaun emerjénsia no konsekuénsia sira iha rejiaun Ázia-Pasífiku. CARE nia fokus atu lori feto sira ba iha planeamentu umanitária mak hamenus ativamente lakuna ne’e. ”

Embaixadór Uniaun Europeia ba Timor-Leste, Andrew Jacobs, rekoñese katak alterasaun klimátika sira sai grave liu tanba degradasaun ambientál, “aleinde hasoru risku naturál ne’ebé maka’as ne’ebé bele hamosu dezastre, mudansa klimátika no degradasaun ambientál sai mós hanesan kauza husi konflitu, inseguransa ai-han no dezlokamentu. Tanba ne’e, inisiativa di’ak ida hodi introdús atividade sira hanesan koñesimentu kona-ba bee sa’e no sensibilizasaun kona-ba risku ba membru komunidade sira iha munisípiu 13 liu husi CARE nia revista edukasaun Lafaek ne’ebé naruk hanesan dezeña ona iha programa ne’e”. (KI)