C12N Lansa Pontu Hitu Relasiona ho Estadu atu Disolve Komisaun Omenajen

by -34 views
Imajen ne’e hatudu Prezidente Komité 12 Novembru (C12N sigla Portugués), Grigorio Saldanha hato’o deklarasaun iha konferénsia ba imprensa no akompaña husi membru sira, iha Sede Sentral C12N, Balide, Dili.

DILI (Timor Post)—Relasiona ho Estadu Timor Leste nia agenda atu disolve ka taka Komisaun Omenajen, Supervisaun ba Rejistu no Rekursus (babain bólu Komisaun Omenajen), maka Comité 12 Novembro liuhusi konferénsia ba imprensa neebé hala’o iha loron 08/07/2021, hato’o hanoin sira hanesan tuir mai ne’e :

  1. Comité 12 de Novembro hakarak agradese ba kna’ar ne’ebé Komisaun Omenajen halo ona, no hakru’uk ba Governu nia desijaun hodi hapara instituisaun Komisaun Omenajen ho nia serbisu sira, tamba iha ona Ministériu Asuntus Kombatentes Libertasaun Nasionál ho Konseilu Kombatentes Libertasaun Nasionál atu asume kna’ar ida ne’e ;
  2. Maibé Comité 12 de Novembro lamenta tebes, tamba to’o oras ne’e Governu sira ne’ebé kaer ukun tutuir malu, seidauk resolve Kombatentes Libertasaun Nasionál inklusive Materestu 12 Novembro sira nia direitu pensaun, tuir Estatutu Kombatentes Libertasaun Nasionál Artigu 23;
  3. Tamba ne’e maka liu husi Konferénsia Imprensa ne’e, Comité 12 de Novembro hakarak EZIJE ba Ministériu Asuntus Kombatentes Libertasaun Nasionál ho Konseilu Kombatentes Libertasaun Nasionál, atu resolve ona iha tempu badak Kombatentes Libertasaun Nasionál, inklusive Materestu 12 Novembro sira nia direitu ba pensaun, tamba sira hein hela direitu ida ne’e desde tinan 2009 ka balu antes kedas,  ne’ebé seidauk resolve to’o oras ne’e. Ita triste tamba maluk balu hein hela sira nia direitu ne’e to’o mate tamba idade ka mate tamba kondisaun vulnerável no moras, hanesan konsekuénsia husi sira nia partisipasaun ba luta Libertasaun Nasionál. Diresaun Nasionál Comité 12 de Novembro hamutuk ho nia estrutura sira iha base sei kontinua ezije  ba Ministériu Asuntus Kombatentes Libertasaun Nasionál ho Konseilu Kombatentes Libertasaun Nasionál to’o hetan nia solusaun;
  4. Aproveita oportunidade ida ne’e atu EZIJE mos ba Ministériu Asuntus Kombatentes Libertasaun Nasionál ho Konseilu Kombatentes Libertasaun Nasionál atu tau matan sériu ba Veteranus no Kombatentes Libertasaun Nasionál sira ne’ebé moras todan ne’ebé presija intervensaun lalais hodi halo tratamentu. Tamba prátika hatudu dala barak ona katak ema Veteranus no Kombatentes Libertasaun Nasionál balu mate tamba laiha atendimentu lalais no sériu;
  5. Ami hein, atu ema hotu ne’ebé uluk fo’o ona sira nia kontribuisaun hodi ohin Timor Leste bele hamrik hanesan rai ida independente bele hetan sira nia direitu, antes sira mate ka moris nafatin iha situasaun susar oioin tamba deit Estadu la’seriu no lalais resolve sira nia direitu;
  6. Ikus liu, ami husu atu Polítik sira, Ukun Na’in sira, Parlamentar sira, Tribunál sira, PNTL ho FFDTL sira, Estadu nia Servidor sira seluk, Joven sira, no Povu tomak, atu rekupera fali armonia, respeita no hadomi malu, iha toleránsia no perdua malu, tau ás ita nia Konstituisaun Repúblik no Léi sira, iha tempu difísil oras ne’e tamba Impase Polítika, tamba Pandemia Covid-19, no liliu iha tempu preparasaun ba Eleisaun Presidensiál iha tinan oin mai, atu nune’e Timor Leste bele hakmatek, no  Desenvolvimentu Nasionál bele lao lalais hodi garante Moris Diak ba Povu Maubere tomak;
  7. Atu taka, husu ba Ministériu Saúde atu halo esplikasaun klean no klaru ne’ebé bele garante konfiansa ba ita nia komunidade sira, hodi ba halo Vasina atu hetan imunidade kontra Covid-19. Husu ba ma hotu atu Mantén Nafatin Protokólu Saúde hodi Tau Máskara, Hadook ‘An Husi Maluk Seluk, no Fase Liman Bebeik !!. (*)

No More Posts Available.

No more pages to load.