BTL E.P Prevee Rihun 347 USD ba Sistema Fornesimentu Bee Moos iha Mehara

by -317 views
Prezidente BTL, E.P Carlos Peloi Dos Reis (liman loos) no diretór kompañia Fuente de Exito JV, Anjelo da Silva (liman karuk), kaer liman hafoin asina kontratu, iha Edifísiu BTL, E.P Kaikoli, (kinta (17/2). Foto TP/ Mariano Abi

(Reportajen Mariano Abi/ Editor Mateus da Cruz)

Dili (Timor Post) – Bee Timor-Leste Empreza Públika (BTL, E.P), asina kontratu ho Kompañia Fuente de Exito JV, no Acelda Unip. Lda, ho montante rihun 347 USD ba projetu fornesimentu Bee Moos iha suku Mehara, Munisípiu Lautein ho durasaun projetu fulan neen.

Prezidente BTL, E.P Carlos Peloi Dos Reis, hatete, orsamentu ne’e sei utiliza hodi mellora Sistema fornesimentu Bee Moos iha suku Mehara, Munisípiu Lautein, tanba durante ne’e komunidade rihun 2 ho xefi familia 450, iha suku Mehara, la asesu Bee Moos.

“Ami halo levantamentu dadus iha tinan kotuk, ita konsege halo hotu dezenu hirak ne’e, ita prosesu konfirmen iha tinan kotuk, to’o ohin ita konsege konklui ona kompanhia Fuente de Exito JV ho Acelda Unip. Lda mak manaan no ohin asina kontratu ona, sira bele tun halo servisu iha tempu badak,” nia dehan ba jornalista sira hafoin remata asinatura iha Edifísiu BTL, E.P Kaikoli, kinta (17/02).

Nia rekomenda ba kompañia rua ne’e tenke mantein serbisu tuir kontratu ne’ebé mak iha.

“karik tanba kestaun natureza ka buat ruma, sira presiza informa ba BTL, E.P ninia tékniku sira, atu bele aprova uluk, mak sira bele halo mudansa tuir sira nia hanoin de’it ou sira nia haree,” nia husu.

Iha sorin seluk Diretór kompañia Fuente de Exito JV, Anjelo da Silva, hatete, sira sei hahú servisu tuir kontratu ne’ebé maka iha.

“ba kontratu ne’e loron ruanulu resin rua Fevereiru ne’e hahú ona, depois ida ne’e hotu kompañia rua ne’e komesa ona tun ba terrenu,” hakotu. (Lee notisia seluk iha jornal Timor Post/asesu you tube Timor Post)

No More Posts Available.

No more pages to load.