BrigJen Coliati fó Sai Data Públika Lista Kandidatu F-FDTL

by -5.589 views
Xefe Estadu Maior FALINTIL-Forsa Defeza Timor Leste (F-FDTL), Brigadeiru Jeneral Coliati. Foto Jaime Pires

Jornalista Jaime Pires / Editór Noémio Falcão

DILI (Timor Post)— Xefe Estadu Maior FALINTIL-Forsa Defeza Timor Leste (F-FDTL), Brigadeiru Jeneral Coliati informa, loron  15 fulan Setembru 2021 taka sai ona lista membru foun sira.

Ba Jornalista sira iha Ministeriu Finansas Aitarak Laran, Dili, Segunda (06/09/2021) ne’e hafoin mai partisipa iha Komisaun Revizaun Orsamentu Polítika (KROP), Coliati hatete, hafoin públika lista sei reintegra kedas ba Kuartel Metinaro.

“Setembru ne’e nia laran ita reintegra kedas sira foun ne’e ba iha Metinaru, maibé data ba bainhira mak atu reintegra ne’e ha’u seidauk bele fó sai,” Coliati dehan.

Nia subliña, tanba durante ne’e seidauk taka sai hela de’it naran kandidatu ne’e tanba sei hein ekipamentus mai husi rai li’ur inklui farda, maibé ekipamentu prepara ona tanba ita iha ona orsamentu atu selu maibé tanba pandemia entaun trasporte atu transporte sasán sira husi tasi balun mai ne’e mak problema.

Nia deklara, maibé agora rezolve ona no sasán agora ida dalan mai ona no balun iha hela hein ida iha dalan to’o mai bele taka sai ona naran.

“Kandidatu sira ne’e iha Setembru nia laran, ha’u Promete katak naran iha dia 15 Setembru sei públika naran, depois hare bainhira mak atu lalin sira tun ba iha Metinaru”, tenik Nia.

Nia deklara, durante ne’e adia hela de’it loron atu taka sai naran ne’e tanba, iha Timor-Leste atu suku farda ba ema rihun ne’e seidauk bele, entaun husu ajuda ba rai seluk no rai seluk mós enfrenta hotu ba pandemia ne’e mak prosesu ne’e naruk.

Maibé, agora iha loron 15 fulan Setembru ne’e fiksu ona atu taka sai naran ka lista ba membru foun FALINTIL Forsa Defeza Timor-Leste (F-FDTL) ninia, maibé ba loron atu la’ós sira ba Metinaru mak seidauk fiksu.

No More Posts Available.

No more pages to load.