Bolsu Estudu ba Estudante Hamutuk 910

by -297 views
Hermenegildo da Silva

DILI (Timor Post)—Ministériu Ensinu Superior Siénsia no Kultura liuhusi Fundu Dezenvolvimentu Kapitál Umanu (FDCH sigla portugés), asina kontratu ho estudante benefisiáriu ba programa bolsu hakbiit iha rai laran hamutuk 910.

Diretór ezekutivu FDCH, Hermenegildo da Silva, hatete tuir planu Ministériu Ensinu Superior Siénsia no Kultura tinan ida ne’e governu fó bolsu estudu ba estudante kbiit laek hamutuk 910.

Husi planu ne’e ministériu ensinu superior foti desizaun fahe estudante sira ba instituisaun ensinu superior públiku 500 no instituisaun ensinu superior privadu hamutuk 410.

Nia dehan, programa bolsu Hakbiit governu liuhusi Fundu Dezenvolvimentu Kapitál Humanu prevee osan ho montante millaun $1.5. No planu estudante sira kada fulan sei hetan subsídiu osan $120.00.

“Labarik sira ne’ebé ita fó bolsu hakbiit tenke aproveita didi’ak ho responsabilidade, sansaun depende kontratu. Ikus liu valor la to’o tenke hakotu subsídiu no tenke fó fila fali osan estadu ne’e ita hatene ona iha kontratu,” Diretór ezekutivu FDCH, Hermenegildo da Silva hatete ba jornalista sira iha salaun Liseu UNTL, Tersa-feira (17/08).

Nia hatete, Fundu Dezenvolvimentu Kapitál Humanu hahú halo ona kontratu ho estudante bolsu kbiit laek sira hamutuk 910 ba instituisaun ensinu superior hotu-hotu tantu públiku no mós privadu. Maibé estudante sira tenke responsabilidade tuir kontratu ne’ebé mak iha.

Nia esplika, regra ne’ebé mak estudante sira responsabilidade boot mak siénsia sosiais nia valor tenke to’o 3 ba leten, no siénsia naturais valor 2.75. Ida ne’e mak regra ba estudante sira atu estuda di’ak liután. Tanba sira tenke iha responsabilidade ba investimentu ne’ebé estadu fó ba sira.

Tanba ne’e mak sira tenke utiliza didi’ak bolsu estudu ne’ebé estadu investe ba sira. Karik estudante sira valor la to’o sei iha sansaun tanba regra tau ona iha kontratu.

“Ha’u hakarak hatete katak ida ne’e kada fulan tolu no fulan neen ita halo fiskalizasaun ida ne’e kompeténsia boot ba fundu dezenvolvimentu kapitál umanu no ministériu ensinu superior para hatene sira ninia progresu,” nia dehan.

Iha fatin hanesan, reitór UNTL, João Soares Amaral, hatete agradese ba governu liuliu ministériu ensinu superior siénsia no kultura ne’ebé mak kria fundu hakbiit hodi fó ba estudante ne’ebé mak mai husi família kbiit laek.

“Inisiativa ne’e bele ajuda família kbiit laek iha Timor tomak ne’ebé mak prienxe kritériu hodi hetan oportunidade haruka sira nia oan mai eskola iha universidade estadu mak selu,” nia agradese.

Nia haktuir, estudante sira ne’e tuir ona prosesu aprendizajen normal iha universidade nasionál Timor-Lorosa’e, ohin mak foin asina kontratu ho fundu dezenvolvimentu kapitál umanu.

Entretantu, reprezentante estudante bolsu hakbiit, Pedronela Bosquifai, hatete agradese ba governu liuliu ekipa avaliasaun tanba nia bele pasa sai benefisiáriu bolsu hakbiit.

“Ha’u maski difisil maibé ha’u tenke responsabilidade estuda maka’as no ami prontu atu hasoru saida de’it, ami nafatin realiza to’o ami remata ami nia estudu,” nia hatete. (ono/mj11)

No More Posts Available.

No more pages to load.