Bis Diresaun Baukau Mantein Presu

by -461 views
Foto Espesial

DILI (Timor Post)-Hafoin implementa konfinamentu obrigatóriu semana rua nia laran ligadu surtu Covid-19 no variante delta iha kapitál Dili, iha loron 10 Setembru ne’e governu liuhusi Konsellu Ministru hakotu konfinamentu hodi reativa atividade públiku sira inklui operasaun transporte públiku.

Kondutór bis diresaun Baukau-Dili, Edelfonso da Costa Freitas, sente kontente hala’o hikas operasaun ho presu ne’ebé hanesan.

“Selu hanesan bai-bain, Baukau-Dili $4.00, ba-mai $8.00, ami la hasa’e folin transporte nian,” informa Edelfonso ba Timor Post, iha terminal Bekora, Kinta (16/09).

Nia dehan, kazu Covid-19 ne’ebé aumenta halo pasajeiru sira tauk hodi hala’o viajen no daudaun ne’e pasajeiru limitadu tebes.

“Uluk ne’e ema barak, sira ne’ebé fa’an sasán ne’e ba mai kada loron, agora ema tauk hotu, pasiensia ita halai de’it ona para enxe mina no setór ninian, setór ne’e tuir pasajeiru ne’e sae, dala ruma setór $50.00 no ense mina $45.00 ba-mai,” nia hatete.

Entretantu, tuir regra ne’ebé governu fó sai katak pasajeiru sira tenke iha kartaun vasinasaun doze daruak no uza maskára inklui handsanitizer molok hala’o viajen ba munisípiu seluk liuliu mai kapitál Dili.

Nune’e mós ba kondutór transporte públiku sira tenke uza maskára, dokumentu karreta no karta kondisaun.

Aleinde ne’e, kondutór bis Ramelo Pinto dos Santos informa, pasajeiru sira ne’ebé mak utiliza transporte públiku, liuliu ba bis diresaun Vikeke-Dili ho ninia presu nafatin $8.00 ba kada pasajeiru.

“Husi Dili ba Vikeke $8.00 , ne’e normal. Orsida ita husu liu mós ladún di’ak tanba oras pandemia hanesan ne’e, se ita husu liu mós ita nia maluk sira bele hirus ita se la’e problema mós bele iha,” nia dehan ba jornalista Timor Post, iha terminal Bekora,Tersa (14/09).

Portantu, nia dehan, maski sira halo operasuan maibé nafatin kumpre regra no protokolu saúde inklui vasina kompleta.

“Agora ita bele sai ba distritu ida tenke iha kartaun kinur,” nia katak.

Antes covid-19, nia dehan, folin nafatin $8.00 ba-mai Vikeke-Dili to’o agora mós nafatin, laiha mudansa.

“Agora ita husu labele liu, covid-19 hanesan ne’e ita selu liu mós ladún di’ak sela’e bele estraga sasán mós iha,” nia katak.

Ate kondutór no ajudante (konjak), nia hatete, bele hetan baku, ameasa bele iha, ne’e duni nafatin selu hanesan uluk.

Portantu, ho situasaun hanesan ne’e pasajeiru sira ladun halo viajen, entaun ladun iha pasajeiru. Kada ves nakonu, kadaves la nakonu sai husi kapitál Dili ba munisípiu.

Iha sorin seluk, kondutór bis diresaun Suai, Febriyanto Amaral informa presu bis hanesan bai-bain, kada ema ida $15 maibé agora ne’e ladun iha pasajeiru.

“Kada ema ida, nafatin $15.00 hanesan uluk husi Dili ba to’o Suai, lori sasán foos karon rua tolu, ne’e foin selu tanba ita haree sasán ne’e barak,” nia hateten.

“Soke ita la’o agora ne’e lahanesan uluk, uluk dalan loke normal ne’e ita la’o sei hetan netik osan, mas agora ne’e tergantung ema ne’ebé mak swab no vasina dala rua mak bele halo viajen,” hatutan nia.

Kona-ba pasajeiru ladún iha, nia afirma, situasaun ida agora ne’e la hanesan uluk, tenke swab kuandu atu la’o no vasina kompletu mak foin halo viajen.

Portantu, durante hala’o operasaun loron primeiru to’o agora, foin halo dala rua ne’e halai mai lori ema nain neen (6), ba fali mós na’in neen (6) pois agora fali ema laiha.

“Entaun patraun labele lami tanba ami la hala’o servisu, sira mós la hetan osan,” nia dehan.

Kona ba saida mak halo durante bis la hala’o operasaun, nia dehan, hanesan ema umanu ida, tenke buka rasik osan, halo ruma ne’ebé bele hetan osan, hanesan hili ai-maran sira ba fa’an. (Jho/mj4/mj7).

No More Posts Available.

No more pages to load.