BETA Potensial Tebes Sai Fatin Turístiku

by -125 views
KREATIVU-Joven BETAKRE mobiliza malu dezenvolve tasi ibun Tali laran, aldeia Beto Tasi, suku Madohi, postu Dom Aleixo sai fatin turístiku. Foto TP/Maria Lizia.

(Reportajen Florindo Coluna / Editór Isabel Ermelita)

DILI (Timor Post) – Joven sira iha aldeia Beto Tasi (BETA), suku Madohi, Postu Administrative Dom Aleixo, dezenvolve daudauk ona tasi ibun tali laran hodi sai fatin turistiku, atrai vizitor sira, nune’e bele rekolla taxa hodi hatama ba kofre estadu iha futuru mai.

Bainhira Timor Post halo observasaun ba aldeia Beto Tasi, iha Segunda (21/06), iha oras tuku 10:00, joven kuaze na’in 50 resin, hahú halibur malu iha area Tali Laran, sira fahe servisu ba malu tuir estrutura ne’ebé sira define ona.

Grupu joven ne’ebé ho naran ‘BETAKRE’ (Beto Tasi Kreativu), koloka ninia joven sira hahú hein ema husi portaun entrada Aldeia Beto Tasi to’o hein fatin parajen karreta motor, foin maka akompaña bainaka sira tama iha area Tali Laran ne’ebé sira dezeña sai furak ba sítiu turístiku hodi rekolla taxa ba sira no ba estadu.

Hafoin ida ne’e,s Jornalista Timor Post akompaña kedas joven sira ne’ebé organiza an hala’o servisu iha Tali laran hodi prepara tuur fatin ba bainaka sira, ne’ebé halo husi nu-hun no Tali-hun, pinta, tara subliña, husi tali hun ida ba fali tali-hun seluk, fatin labarik sira sa’e boi, nune’e mós balu kee daudauk ona sintina públiku para bainhira vizitante sira mai uza.

Koordenadór Jerál Grupu Joven BETAKRE, Santiago Marques, dada lia ho Timor Post katak, sítiu turístiku Tali Laran ne’ebé sira dezenvolve daudauk ne’e atu atrai ema, tantu timoroan no mós estranjeiru hodi bele halo paseiu iha fatin refere.

Portantu, Joven Beto Tasi rasik maka tau osan hamutuk hodi dezenvolve potensiál sira ne’e, nune’e bele atrai turista sira no ba futuru bele fó reseita ba sira no ba estadu.

Tanba husi inisia primeiru dia 04 Juñu, hahú la’o fatin ne’e hean vizita ema barak iha parte lokraik entaun joven sira kria fatin parajen (parkiran) karreta no motor nian hodi kontrola no sira rekolla taxa husi parajen no bainhira tama iha area Sítiu Turístiku Tali Laran tenke selu ho osan $1.00.

“Iha ne’e ami joven rasik maka halo kontribuisaun tuir ema ida-idak nia forsa, uluk liu primeira ha’u gasta lato’o $30,00 hanesan ne’e mak inisia halibur kolega sira hodi dezenvolve fatin Tali Laran sai sítiu turístiku,” Koordenadór Jerál BETAKRE, Santiago ba Timor Post, Segunda (21/06).

“Husi parajen ne’e, loron ida ami hetan entre $5,00 ate $15,00 kada loron ida, ami fó presu kada motor ida sentavu 25, karreta ida sentavu 50,” Koordenadór BETAKRE hateten.

Joven sira ne’e, sei organiza di’ak liu, no sira rasik iha ona konxiénsia para atu dezenvolve sira nia area potensiál sira liu-liu fatin turístiku tantu ekolojia, relijiaun no kultura sei kombina no dezenvolve didi’ak, nune’e ba futuru bele hetan reseita kontinuitas ba povu no ba estadu.

Maski konstroi area turístiku ne’e la’ós fasil, presiza osan, maibé joven sira ne’e halo tuir sira nia kbiit finanseiru ne’ebé maka sira hetan, tanba ne’e konstrusaun sítiu turístiku Tali Laran foin maka atinji  10%.

“Ami nia planu ba dezenvolvimentu turístiku iha Beto Tasi ne’e boot tebes, ida foin halo konstrusaun etapa 10%, bele dehan katak seidauk la’o ho di’ak, más ami koko para sai furak liu tan,” katak Santiago.

Tasi ibun Tali laran aldeia Beto Tasi, foin maka joven sira hala’o servisu hodi dezenvolve maibé atrai ona ema barak ba hasai foto iha fatin ne’ebá.

Entaun joven sira ne’e mós hala’o hela servisu namanas hela aplika daudauk ona tarefa ba vizitante sira ne’ebé maka hasai foto iha fatin ne’ebá kada ema ida $1.00 antes hakat ain tama fatin ne’ebá.

“Ida ne’e foin ami aplika loron tolu, kada ema ida atu tama mai hasai foto iha ne’e ami tau tarefa rasik kada ema ida $1.00 dollar,” Santiago tenik. (Lee Notísia Seluk iha Jornal Diáriu Timor Post)

No More Posts Available.

No more pages to load.