Bee Matan Lelalai Maran

by -177 views
Ilustrasaun

BAUKAU (Timor Post)-Populasaun suku Lelalai, postu administrativu Kelikai, munisípiu Baukau, obrigadu loron-loron sosa bee moos husi karreta tanke tula bee husi Baukau vila tanba bee matan mak maran.

Xefe Suku Lelalai, Salomao Fraga Fernandes haktuir, kada tinan tama ona tempu bailoron populasaun sira sempre enfrenta  problema bee moos.  Situasaun ne’e obriga populasaun hamutuk xefe família 300-resin sosa fali bee hosi karreta tanke folin kada bidón ida dollar rua.

“Situasaun ne’e fó impaktu ba populasaun ne’ebé hetan rendimentu minimu”, informa Salomao Fraga Fernandes ba Timor Post iha Baukau, Domingu (3/10).

Nia esplika, maski bee iha mota laran iha maibé do’ok kilo tolu, jerigen barak la aguenta, tanba ne’e sira deside ko’alia ho karreta tanke bee nian halai mai suku laran loron-loron tanba Estrada komesa di’ak ona.

“Bee iha mota laran iha maibé komu do’ok liu ita nia populasaun tenke la’o ain kilómetru hat to’o neen, depois dala ruma lori jerigen rua to’o lima de’it entaun sira deside halo kontaktu ho ita nia maluk sira ne’ebé iha karreta tanke bee nian husi Baukau lori bee mai foin sira sosa de’it”, nia haktuir.

Nia relata, suku Lelalai iha aldeia haat, kompostu husi aldeia Lawaleru, Dawaduka, Desa no Ossoleru ho total xefe família 408, enkuantu aldeia tolu ne’ebé mak oras ne’e labele asesu bee moos mak aldeia Dawaduka, Desa no Ossoleru.

Problema falta bee moos, parte suku hato’o ona proposta ba SAS munisípiu no iha fulan hirak kotuk ba tékniku sira husi SAS munisípiu no postu halo ona survey ba bee matan Irarogo-Rogo iha foho Matebian hun, ne’ebé ho distánsia kilómetru 16 maibé to’o agora seidauk realiza.

Lider suku Lelalai ne’e informa mós populasaun idade 18 ba leten porsentu 75% mak simu ona vasinasaun AstraZeneca, porsentu 25 mak seidauk simu vasina tanba problema saúde. (gut)

No More Posts Available.

No more pages to load.