BCTL Lansa Relatóriu Inkluzaun Finanseiru 2020

by -101 views
Banku Sentral Timor- Leste lansa relatóriu inkluzaun finanseira 2020, husi Governador Banku Sentral Abrão De Vasconselos entrega distribuisaun kopia relatoriu ba reprejentante husi Kompañia Telemor-Mosan Phan Than Tung ne’ebé akompaña husi Ministru Koordenador Asuntu Ekonomiku, Joaquim Amaral no UN Resident Coordinator, Roy Trivedy, iha Ótel Novu Turismo, Kinta (17/06). Foto TP: Maria Lizia

Jornalista Jeremias Soares / Editora Isabel Ermelita 

DILI (Timor Post)—Iha Kinta (17/06) ne’e, Banku Sentrál Timor-Leste (BCTL) lansa relatóriu inkluzaun finanseira 2020 ho tema “Aumenta Asesu Servisu Finanseiru liu-husi Dijitalizasaun”.

Governador Banku Sentrál, Abrão de Vasconcelos, hateten ne’e relatóriu ba dala-tolu nian, ne’ebé mak BCTL deside kada tinan-rua publika relatóriu inkluzaun finanseira. Ne’e parte ida hanesan kompromisu BCTL nian atu informa ba públiku, governu no instituisaun finanseira no própriu Banku Sentrál rasik kona ba situasaun dezenvolvimentu sistema finanseira iha Timor-Leste.

“Relatóriu 2020 hatudu progresu di’ak tebe-tebes. Populasaun adultu sira ne’ebé mak asesu ba servisu finanseira ne’e ita iha 68%, ne’e signifika kada populasaun adultu, iha 68 mak iha ona kanta bankária. Ida ne’e ajuda ita atu intende kona-ba situasaun dezenvolvimentu iha ita-nia sistema,” Abrão informa ba jornalista sira, iha Otél Novo Turizmu.

Portantu, iha relatóriu ida ne’e, informa mos kona-ba pontu asesu, inklui halo diskrisaun ida sobre oinsá atu check kualidade servisu finanseira sira nian.

“Se ema ida atu mai halo levantamentu osan, nia bele ba iha ATM, sukursál banku nian ou nia bele ba iha ajente ida nian, mais iha relatóriu ne’e mós halo diskrisaun ida sobre oinsá atu check kualidade servisu finanseira sira nian,”  Abrão esplika.

Entretantu, Ministru Koordenadór Asuntu Ekonómiku (MKAE), Joaquim Amaral, hateten sistema ida ne’e BCTL dezeña atu lori servisu atendimentu besik liután ba iha populasaun sira.

“Ohin ita haree, katak servisu ne’e iha ona rezultadu 60% pontu atendimentu iha munisípiu sira, ida ne’e avansu boot ida, ita hein katak sósiu ne’e kontinua halo, mezmu iha situasaun pandemia COVID-19. Ita hare katak, Banku Sentrál kontinua hadi’a sira nia servisu, atu bele atrai barak liután partisipante sira, instituisaun mikro finansas sira no banku sira atu partisipa barak liu, atu nune’e bele fasilita ita-nia populasaun bainhira halo tranzasaun ruma, la presiza dezloka husi fatin ida ba fatin seluk,”  Joaquim afirma.

Abrão admite, iha pontu asesu no númeru populasaun adultu ne’ebé mak asesu ba finanseiru báziku ne’e, iha munisípiu rua mak ninia nivel sei ki’ikoan kompara ho munisípiu sira seluk, munisípiu rua ne’e mak Ermera no Baukau.

“Entaun ida ne’e ezersisiu ida ba Governu, Banku Sentrál no  Instituisaun Finanseira sira presiza hare, tanba saida mak ninia pontu asesu númeru ne’e oi-tuan, populasaun ne’ebé asesu ba servisu finanseira mós nia nivel ne’e ki’ikoan, entaun ida ne’e hanesan trabalho casa ida ba hothotu presiza hare, karik bainhira Governu dezeña programa ruma, informasaun ida ne’e hanesan referénsia,” nia dehan.

Joaquim hatutan, governu kontinua fó suporta ba planu sira ne’ebé mak BCTL halo, inklui instituisaun finanseira sira ne’ebé partisipa iha prosesu refere. No enkoraja atu sira atu hadi’a produtu, atu bele fó atendimentu di’ak liután ba sira nia kliente.

Enkuantu, eventu ida ne’e partisipa husi membru governu, instituisaun finanseira no parseiru dezenvolvimentu ne’ebé iha papél dudu dezenvolvimentu setór finanseiru. Eventu ida ne’e hetan palestra husi Ministru MKAE, Koordenadór Nasaun Unidu, Roy Trivedy, Alfred Hanning Diretór Ezekutivu Aliadu ba inkluzaun finanseira, no mós jestór husi Banku Sentrál. (Lee notisia kompletu iha Diariu Timor Post)

No More Posts Available.

No more pages to load.