Bankada PLP Deside Domingas dos Santos Provizoriamente Substitutu Saudozu Guntur

by -31 views

Timor Post (28/01/2021)—Bankada parlamentár Partidu Libertasaun Popular (PLP) proporsinoalmente deside Domingas dos Santos tuir lista partidu nian hodi substitui temporariu saudozu Deputadu Sabino Soares “Guntur” nia fatin.

Vise Prezidente Bankada PLP, Francisco Vasconcelos, hatete substituisaun ne’e sei temporaria, depois mak partidu sei haree fila fali atu mantein ka lae. No bainhira substituisaun definitivu ona foin mak haruka karta ba meza Parlamentu Nasionál.

“Ida ne’e sei substituisaun temporaria, depois ida ne’e hotu mak foin partidu haree fila fali. Se senora Domingas prontu mantein, se dehan keta iha asuntu seluk urjente, entaun lista seluk tama. Agora daudauk sei substituisaun temporaria, tanba natoon substitui temporaria ne’e Deputadu sei moris hela, agora depois de funeral hotu tiha mak foin haree fila-fali. Kuandu partidu deside ona dehan substituisaun definitivu, ne’e mak foin haruka naran no karta ba Parlamentu, katak husu substituisaun definitivu”, Vasconcelos esplika.

Vasconcelos adianta mate isin Saudozu deputadu Sabino Soares “Guntur” haloot iha jardín eroi Metinaru.

Saudozu Guntur hakotu is iha sala ICU-HNGV iha loron sábadu (23/01) maizumenus oras tuku 4:50 dadeer ho idade 45, tanba sofre moras diabetes.

Deputadu Sabino Soares “Guntur” moris iha loron 08 fulan Jullu tinan 1975 iha Lelalai Quelicai-Baukau. Saudozu hanesan oan mane da-haat.

Saudozu kaben ho Sra. Elizita Fatima de Jesus husi Likisá, Uma lisan Pisu-Lete, Suku Lauhata, munisípiu Likisá. Sira na’in rua hetan dotadu ho oan na’in 5, mane 4 no feto 1, mak hanesan Selly Romance Guntur Soares, Salagueru Guntur Soares, Salaria Guntur Soares, Jemmore Ellymor Guntur Soares no  Jé Guntur Kay Rala Ell Fatima Soares.

Jornalista : Julio Salinas Soares

Editor: Mariano Martins

No More Posts Available.

No more pages to load.