Badaen Lori Katana Ameasa Uma Nain Tanba Selu La Kompletu

by -929 views
Ilustrasaun

DILI (Timor Post)—Tanba de’it lezadu BM la selu osan kompletu ba arguidu CMM hafoin arguidu nu’udar badaen reboka tiha lezadu nia uma, halo arguidu nervozu no lori katana maubeka ba ameasa lezadu iha ninia servisu fatin.

Tuir kronolojia, iha 12 Fevereiru 2020 tuku 09:30 OTL, lezadu halo kontratu ho  arguidu hodi reboka uma andár ho valor rihun rua US$2000.

Iha momentu ne’ebá arguidu serbisu seidauk hotu maibé lezadu konsege selu ba arguidu ho montante US$1775 (rihun ida atus hitu, hitu nulu resin lima) maibé osan restu hamutuk atus rua, rua nulu resin lima lezadu seidauk fó tanba haree katak arguidu reboka uma ladún di’ak tanba ne’e arguidu hodi para tiha no la konsege serbisu.

Liu tiha semana ida arguidu mosu fali iha lezadu nia serbisu fatin no arguidu foti tiha lezadu nia save karreta no bainhira lezadu hakat ba arguidu atu foti save maibé arguidu tau tiha save ne’e ba iha kalsa bolsu laran, nune’e lezadu hit sae tiha arguidu nia faru maibé katana mak monu tun ba rai.

Tanba ne’e, lezada haree no ta’uk hodi halai sees husi fatin akontesimentu maibé arguidu kontinua duni lezadu to’o mai iha estrada boot.

Konsekuénsia husi arguidu nia hahalok ne’e halo lezadu sente ta’uk hodi ba hato’o keixa iha polisia.

Ministériu públiku konsidera arguidu hanesan ko autór material ho forma konsumadu ba krime armas Branka ne’ebé previstu iha artigu 2 númeru 1 alínea b husi dekretu lei númeru 5/2017. No krime ameasa ne’ebé previstu iha artigu 157 husi kódigu penal.

Hatán ba akuzasaun husi Ministériu Públiku nian arguidu deklara katak faktu sira ne’e los hotu.

“Iha momentu ne’ebá ha’u husu osan maibé lezadu halai sees husi ha’u kuandu ha’u ba serbisu nia la iha fatin tanba ne’e ha’u hirus hodi katana ameasa nia,” dehan arguidu ba Tribunál iha sala julgamentu

Arguidu mós esplika katak, nia husu osan la’ós dala ida maibé beibeik ona, tanba iha kontratu laran loron ida US$10 fulan ida US$300, iha momentu ne’ebé lezadu selu tiha rihun ida atus hitu, hitu nulu resin lima maibé restu seidauk fó. Depois problema tiha mak patraun foin fó nia osan kompletu.

Nune’e lezadu mós konfirma iha faktu katak iha momentu ne’ebá arguidu sikat hela katana ida iha nia kalsa tanba ne’e lezadu hi’it tiha arguidu nia faru mak katana monu.  Nune’e lezadu hetan hodi halai ba hato’o keixa iha polisia.

“Iha momentu ne’ebá arguidu ameasa duni ha’u ho katana no dehan o la lahai  ha’u sei  ha’u taa mate o,” lezadu hatete.

Tribunál rona tiha husi parte arguidu ho lezadu Tribunál submete kedas ba alegasaun final.

Iha alegasaun final Ministériu públiku akuza arguidu ho krime rua krime ameasa ho krime armas brankas, maibé krime ameasa tribunál halo tentativa rekonsiliasaun no lezadu mós iha vontade dada fila keixa, maibé ba krime armas Branka ne’e tribunál kontinua halo julgamentu tanba krime ne’e nia kastigu tinan 3 to’o tinan 6 prizaun.

Nune’e parte defeza husi arguidu nia mós deklara katak, motivu husi akontesimentu ida ne’e tanba arguidu ezije nia direitu nu’udar traballadór hanesan iha kontratu laran.

Tanba ne’e, tuir defeza nia hare ho arguidu nia emosaun maibé faktu sira ne’e arguidu rekoñese, ho nune’e bazeia ba sirkunstánsia sira ne’e parte defeza husu ba tribunál aplika pena prizaun tinan 2 suspende ba tinan 3.

Tribunál rona tiha husi parte MP-DP tribunál deside adia julgamentu ne’e ba fali loron 26 fulan ida ne’e tuku 5:00 loraik hodi rona desizaun.

Audiénsia julgamentu ne’e preside husi koletivu, Afonso Carmona, Albertina Neves, Ercília de Jesus, Ministériu públiku husi prokuradór Claudio Ximenes, arguidu hetan asisténsia legal husi defensór públiku Henrique Mariz. (jxy)

No More Posts Available.

No more pages to load.