Ba Halo Toos Hamutuk, Laen Oho Feen no Halai ba Polísia

by -14.200 views
Imajen ne'e hatudu polisia hamutuk ho komunidade evakua mate isin iha fatin akontesimentu. Foto Espesial

DILI (Timor Post)—Mosu akontesimentu ida iha Suku Hoho-Lau, Ponstu Administrativu Aileu Villa Munisípiu Aileu, Kuarta kalan (20/10/2021), laen ho inisial SM oho feen inisial PL. Família ne’e iha oan oan na’in-haat, feto rua-mane rua.

Vizinu husi família ne’e, Benedictus Soares Magno ba Timor Post via telefone haktuir, feen ho laen ho sira nia oan kiik na’in-rua maka ba halo toos distánsia dook husi uma. Família sira la hatene iha problema ruma tanba baibain sira toba iha uma toos hodi halo toos, maibé iha loron ne’e derepente sira rona fali informasaun katak, laen oho tiha feen no halai ba entrega aan ba Polísia Munisípiu Aileu.

“Uma toos ne’e dook husi komunidade sira, viziñu mos laiha, iha ailaran. Labarik na’in-rua mos kiik labele halo buat ida, sira nia aman oho nia nia ama, halai ba fo hatene tiha polísia maka polísia foin fó hatene fali ami  foin rona,” Benedictus haktuir.

Polísia to’o iha fatin akontesimentu labele salva ona inan feton ne’e, maibé autoridade sira deside lori mate isin ba halo autópsia iha Dili no halo investigasaun klean kona-ba motivu husi akontesimentu ne’e.

Komandante Daruak Polísia Nasionál Timor Leste (PNTL) Munisípiu Aileu, António Soares hatete, nia parte kontinua rekolla informasaun komplutu kona-ba motivu mak sei fó sai ba públiku.

Normalmente prosesu ba kazu krime, PNTL hafoin rekolla informasaun hotu prosesa ba Ministériu Públiku no julgamentu iha Tribunál.

Aileu pertense ba Tribunál Munisípiu Dili. (cao)

No More Posts Available.

No more pages to load.