Aviaun Rua Hahú Lalin Australianu Sira Sai husi Dili Tanba Tauk Virus Corona, TMR Prefere Teste Masal

by -75 views

DILI—Aviaun rua ne’ebé durante ne’e halo operasaun ba mai Dili ho Darwin iha dader no lorokraik, hahú Sexta (20/03/2020), semo dala ida iha parte dader hodi lalin australianu sira sai husi Dili tanba preokupa ho pandamia virus corona ne’ebé tuir sira kleur ka lalais ho fasil tama iha Timor Leste.

Australianu ida ne’ebé semo tiha ona ba Darwin bainhira dada lia ho Timor Post hatete, sira tauk tebes ho virus ne’e tanba iha mundu hamate ema rihun ba rihun ona, no daet ona to’o Indonézia ho númiru sa’e lalais de’it halo sira sente la seguru iha Timor Leste.

Australianu ne’e hato’o mós preokupasaun hanesan ho amerikanu sira husi korpu da páz ne’ebé aranka uluk tiha ona iha semana kotuk katak, seguransa saúde ba sira nia a’an ne’e importante tebes iha nasaun ne’ebé de’it mak sira hala’o servisu ba.

Fonte kredivél iha Embaixada Austrália haktuir, australianu maioria mak semo tiha ona ho aviaun ba Darwin inklui funsionáriu sira iha embaixada, ajénsia sira husi nasaun ne’e nian.

“Embaixadór mak sei augenta hela ho staff na’in hira iha ne’e,” fonte ne’e konfesa.

Estranjeiru sira ne’ebé fila ona ba sira nia rai inklui amerikanu, australianu no koreanu sira.

Entretantu Primeiru Ministru Taur Matan Ruak diskuti ona ho Prezidente Repúblika Francisco Guterres Lú Olo no prefere teste masal, tanba deskonfia virus corona tama tiha ona iha rai laran.

“Dala ruma iha ne’e ona, agora psikolojikamente no moralmente ita tenke preparadu. Ita labele hanoin dehan buat ne’e malae de’it,” Taur dehan.

Nia hatete, bainhira timoroan sira husi Korea tama iha rai laran ba liu ida-idak nia uma. Tanba ne’e, Xefe Governu ne’e dehan, presiza iha duni teste masal maibé depende ba ekipamentus. (cao)  

No More Posts Available.

No more pages to load.