Aviaun Militar Ida Evakua Amerikanu iha Aeroportu Komoro

by -63 views

Timor Post (01/02/2021)—Aviaun Militár husi Estadus Unidus Amérika (EUA) tún iha Aeroportu Internasionál Nicolau Lobato, Komoro, Dili, ohin dader hodi evakua sidadaun Amerikanu ida ne’ebé hala’o misaun iha Timor Leste.

“Maluk sira hotu, kolega ida husi Misaun EUA nian hetan kanek husi asidente ida iha fim da semana ne’e,” haktuir iha pájina offisiál Embaixada EUA nian iha Dili.

Evakuasaun ne’e hala’o hodi ba hala’o tratamentu saúde iha EUA.

Ministru Transporte no Komunikasaun (MTK), José Agostino konfirma katak, antes ne’e Embaixada EUA iha Dili halo ona komunikasaun ho parte relevante sira inklui MTK rasik hona-ba objetivu aviaun ne’e mai Dili.

“Ita simu pedidu (medical request) para moras ne’e bele transporta ba rai liur,” Ministru José haktuir ba Jornalista sira.

Nia subliña, kualker aviaun ne’ebé tama sai iha aeroportu tenke iha autorizasaun.

“Buat ne’e kordenadu para evita buat ne’ebé mak ita la espera,” Governante ne’e subliña.

Jornalista Olga Soares

Editór Noémio Falcão

No More Posts Available.

No more pages to load.