Avaliasaun PNTL ba EE, Komisáriu Faustino: Povu Barak La Sensitivu ho Prevensaun Covid-19

by -141 views

Timor Post (28/08/2020)-Komandante Jerál Polísia Nasionál Timor-Leste Komisáriu Faustino da Costa, Sesta (28/09) enkontru ho Komandante Komandu Munisípiu sira hodi avalia servisu polísia nian ba implementasaun Estadu Emerjénsia da-haat.

Hafoin enkontru kuaze oras hat ne’e remata Komisáriu Polísia Faustino da Costa, hatete kuaze komandante Munisípiu sira levanta dezafiu ne’ebé hanesan katak, bainhira Polísia halo sensibilizasaun ba implementasaun Estadu Emerjénsia da-haat atu prevene Surtu Kovid-19 populasaun sente baibain ladún fiar.

“Enkontru avaliasaun ne’e para rona komandante sira, liu-liu kona-ba implementasaun Estadu Emerjénsia ba dala haat nian ne’e, sá dezafiu ne’ebé sira iha, maibé saida maka Komandante sira hato’o, katak implementasaun Estadu Emerjénsia da-haat ne’e, kuaze munisípiu sira ne’e ita sensibiliza informasaun mós ema sente dehan baibain hela, ne’e dezafiu ida”, hatete Faustino ba jornalista hafoin lidera enkontru refere iha Kuartél Jenerál PNTL Kaikoli, sesta,(28/08).

Komisáriu PNTL ne’e adianta dezafiu sira seluk populasaun sira hosi munisípiu sira la’ós Fronteira ho Indonézia konsidera Surtu Kovid-19 ne’e mosu de’it ka afeta de’it ba povu sira hela iha Fronteira, liu-liu Munisípiu Bobonaru, Kovalima ho Oe-kusi ne’eba de’it.

Entretantu atividade sensibilizasaun informasaun kona bá prevensaun Covid-19 Komandante Jerál hatete Komandu nia orientasaun tenke halo sensibilizasaun ba munisípiu hotu atu povu hotu kumpre regra Estadu Emerjénsia para hodi prevene an hosi Moras invizivel Surtu Kovid-19 nian.(Jornalista: Jaime Pires)

No More Posts Available.

No more pages to load.