Austrália Ajuda Governu Timor-Leste Rezolve Problema Liña Internet

by -266 views
Embaixadór Australia, William Costtelo, (klaran) ho ninia asesór (Liman Karuk) ko’alia hela ho Sekretáriu Estadu Komunikasaun sosiál (SEKOMS), Mericio Juvinal "Akara" (Liman Loos), hafoin remata enkontru kortezia ho iha salaun enkontru SEKOMS, Palasiu Governu, Segunda, (11/04).

(Reportajen Estaziadu Mariano Abi/Asistente editor Hermenegildo da Costa Tilman)

Dili (Timor Post)–Embaixadór Austrália ba Timor-Leste, William Costello, hasoru malu ho Sekretáriu Estadu Komunikasaun Sosiál, Mericio dos Reis “Akara”, hodi diskute kona-ba programa liña internet iha Timor-Leste (TL).

William Costello, hatete, Austrália sei apoiu Timor-Leste hodi implementa projetu fibra Ótiku atu fornese aspetu tékniku, regulamente servisu, merkadu no seguransa cyber hodi garante katak, ninia benefísiu to’o ba povu Timor-Leste tomak.

“Governu Timor-Leste iha  prosesu hetan ona kampaña atu dezenvolve koneksaun internet, no Governu Austrália nafatin apoiu halo liña koneksaun ba internet ho di’ak iha futuru mai,” nia dehan ba jornalista sira hafoin halo enkontru iha Salaun SEKOMS, Palasiu Governu, Segunda, (11/04).

Costello hatutan, Australia nia papél mak atu fornese espertu tékniku no mós servisu iha regulamentu sira no parte merkadu nian atu nune’e kustu internet bele kompetitive iha Timor-Leste, no atu garante oinsá benefísiu hosi fibra ótiku ne’ebé to’o ba povu Timor-Leste tomak.

“Ami mós sei ajuda Governu Timor-Leste atu haree mós cyber security ba seguransa cyber oinsá uza internet ho di’ak no ami esforsu atu servisu iha area sira ne’e hotu bainhira fibra ótika opera iha Timor-Leste,” nia tenik.

Entretantu, Sekretáriu Estadu Komunikasaun Sosiál Mericio “Akara” hatete, ohin hasoru malu ho ambassador Austrália atu troka ideas kona-ba programa prioridade ida mak projetu fibrotic ne’e para ita nia sidadaun sira bele utiliza media ho lalais ho internet ne’ebé mak lais.

“Embaixadór atualiza mós ba SEKOMS kona bá projetu fibra ótiku ne’ebé mak governu Timor-Leste ho Governu Australia iha. Hanesan Primeiru Ministru dehan beibeik ona katak prioridade ida mak projetu fibra ótika atu nune’e ita nia sidadaun sira bele liuhosi internet bele uza ho lalais média, fasil no baratu, ida ne’e mak interese prinsipál,” nia informa

Antes hakotu, ambassador ne’e informa mós kona-ba kooperasaun entre RTTL ho ABC news, ne’ebé mak prosesu tékniku la’o hela, no ida ne’e diak tanba ABC news ne’e média profisionál ne’ebé Timor presiza koopera hodi hasa’e kualidade jornalizmu nian. (Lee Notísia Seluk Iha Jornál Timor Post/ Asesu You Tube Timor Post).

No More Posts Available.

No more pages to load.