Aumenta Tan Kazu Foun Tolu, Ema 26 Mak Izola Ona iha Vera Kruz no Na’in 92 sei Hein Rejultadu

by -287 views

DILI—Timor Leste rejista tan kazu pozetivu ba pesti corona (COVID-19) tolu iha loron Segunda (20/04/2020) hodi muda númeru kazu sa’e ba 22 inklui ida ne’ebé rekopera ona iha loron 10/04/2020. Nune’e, total pasiente ne’ebé atualmente asegura iha sala izolamentu hamutuk na’in 26 inklui kazu provavel na’in-lima.

Porta-Voz Sentru Integradu Jestaun Krize (SIJK), Rui Maria de Araújo liuhusi konferénsia ba imprensa iha Sala de Situasaun haktuir, aumentu kazu tolu ne’e inklui mai husi grupu Hotel Lecidere no Grupu Professor Portugues sira iha Likisa.

Doutór Rui haktuir, iha duni grupu Professor sira iha Likisa iha na’in rua ne’ebé SIJK kategoria ba sub-grupu TL, no na’in ida fila ona ba Portugál iha loron 04/04/2020 kategoria ba sub-grupu P. Grupu rua ne’e hala’o viajen tama Timor Leste la hanesan, grupu TL to’o iha Timor Leste iha 28 Fevereiru 2020, no sub-grupu P to’o iha Timor Leste iha 8 Marsu 2020.

“Sub-grupu TL to’o agora laiha sintomas, maibé tanba sira tama iha kritériu kontaktu besik ho sub-grupu P maka sira submete ba ijame laboratorial no rejultadu ikus hatudu na’in ida pozetivu ho karga viral ne’ebé kiik no na’in-ida seluk interminadu,” Doutór Rui klarifika.

Entretantu timoroan sira ne’ebé pozetivu, nia istoria viajen kuaze hanesan no hela hotu iha kuarentena mak identifika no agora sira hotu inklui sidadaun Portugal na’in rua asegura hotu ona iha sala isolamentu Vera Kruz, Dili.

Iha sala izolamentu, hirak ne’ebé pozetivu haketak iha fatin ida no sira  na’in lima ne’ebé tama iha kategosia provavel ka seidauk iha konfirmasaun lolo’os ba rejultadu laboratorium hamutuk iha fatin ketak. (cao)

No More Posts Available.

No more pages to load.