Atualidade: UPF Kaptura Ema Na’in-7 Atu ba Sa’e Sintu iha Indonézia

by -770 views
Foto Espesial

Jornalista Jaime Pires / Editór Noémio Falcão

DILI (Timor Post)—Komandu Polísia Nasionál Timor-Leste (PNTL) liuhusi Unidade Patrullamentu Fronteira (UPF) kaptura sidadaun timoroan na’in-5 ne’ebé tenta hakat fronteira terrestre ho ilegál ba Indonézia.

UPF kaptura timoroan hirak ne’e iha loron Kinta (05/08/2021). Iha parte dader kaptura uluk na’in-2 ho “ojek” no foin daudaun (lorokraik) kaptura tan joven na’in-5 inklui ema ida fasilita hodi tama iha area ponte Nunura ne’ebé tenta ultrapasa fronteira ilegalmente ba Indonézia ho objetivu sa’e sintu (sabuk) organizasaun arte-marsiál PSHT.

Komandante UPF, Superintendente Euclides Belo, deklara  sidadaun hirak ne’e UPF kaptura liuhusi operasaun Postu Alfa ne’ebé destaka iha fronteira terrestre.

Nia dehan, hosi ema na’in-7 ne’e na’in-2 entrega ona ba eskuadra PNTL Atabae no na’in-5 seluk entrega ona ba eskuadra PNTL Batugade hafoin halo identifikasaun sei entrega ba ekipa saúde COVID-19 hodi halo teste ba sira nia saúde no sei submete ba kuarentena hodi evita propagasaun moras daet COVID-19.

“Loron rua liu ba ami hamutuk ho Vise-Ministru Interior mós kontinua sosializa informasaun ba populasaun iha liña fronteira hodi informa karik hetan ema oin foun ruma iha sira nia let no evita halo kontaktu ho komunidade sira husi Indonézia”, nia dehan.

Nia afirma, asaun kapturasaun ne’e mós nu’udar parte ida hodi evita tranzmisaun peste letál Coronavirus ka COVID-19 tanba nasaun viziñu hanesan Indonézia kontínua eziste propagasaun surtu COVID-19.

Euclides hateten, kona-ba asuntu fronteira ne’e presiza sidadaun hotu-hotu nia kontribuisaun ba seguransa hodi apoiu PNTL no FALINTIL-Forsa Defeza Timor-Leste (F-FDTL).

“Atu prevene kalamidade surtu COVID-19 iha Timor-Leste, ami simu orientasaun husi Komandu Jerál PNTL hodi garante seguransa ba implementasaun Estadu emerjénsia (EE) iha liña fronteira liu-liu iha iha Maliana, Suai to’o Oe-Cusse, entaun ami nafatin esforsu hodi asegura fronteira no sidadaun ne’ebé tama ho dalan ilegál sei kaptura hodi prosesa tuir lei”, tenik komandante UPF ne’e.

Euclides nafatin apela ba sidadaun hotu-hotu ne’ebé hela iha fronteira atu halo kooperasaun diak ho PNTL karik iha ema foun balu halo movimentu informa lalais ba parte seguransa.

No More Posts Available.

No more pages to load.