Atoni Oan Hakarak Governu Hakotu Kontratu Ró Tranship II

by -48 views
Atoni Oan sira ne’ebé maioria estudante hein hela Ró Success hodi tranporta sira ba RAEOA iha Portu Dili, Kinta, (17/6/2021). (Foto TP/Jose Mauno)

(Reportájen Jose Mauno/Editor Suzana Cardoso)

DILI (Timor Post) – Tanba ró Tranship II nia kondisaun dodok no lahuk hodi labele hala’o operasaun, nune’e pasajeiru Dili ba no mai Oe-cusse husu governu atu labele hanaruktan kontratu ba ró ne’e.

“Ami hakarak ró Success mak kontinua hala’o operasaun. Ita hare realidade ró Tranship II daudauk ne’e iha media sosiál dehan ladi’ak. Ita kompara halo viajen Atauro ba no mai Dili deit ladiak, satan ba Oe-cusse.”

Lia fuan hirak ne’e kasu husi Pasajeiru ida, Calisto Cono ba Timor Post iha Portu Dili, Kinta, (17/6/2021) bainhira husu konaba planu governu atu hanaruk tan kontratu ba ró Tranship II hodi halo operasaun ba no mai Dili-Oecusse.

Calisto hateten, komunidade no estudante husi rejiaun Administrativa Espesial Oe-Kuse Ambenu (RAEOA) hanesan pasajeiru permanente ba transporte maritima hakarak govermu sentrál hakotu kontratu ho ró Tranship II.

Katak Calistro, realidade ema hotu hare iha video hatudu ró Tranship II ba de’it Atauro mós ladi’ak. Signifika, ró Tranship II labele hala’o operasaun ba-mai Dili-Oe-Kuse.

“Di’ak liu ita kontinua ho ró Success. Labele kontratu tan ró ida dodok hanesan ne’e. Tanba ita kompara viajen Dili-Atauro ho Dili-Oe-kuse lahanesan,” lamenta Calistro.

Husi informasaun ne’ebé mak Timor Post rekolla hateten, maioria komunidade no estudante sira hakarak viajen ho ró Success. Sira lakohi ba ho ró Tranship II, tanba públikasaun informasaun iha video ne’ebé mak viral iha media sosiál hateten ró ne’e labele halo operasaun ba Atauro.

Aliende ne’e, Atoni oan sira ne’ebé mak atu ba Oe-Kuse tenki hakerek naran iha sede ZEESM Farol. Hafoin ne’e halo teste Swap. Husi rezultadu ne’e mak negativu mak autoridade husik atu fila ba Oe-Kuse.

Tuir observasaun Timor Post iha Portu Dili, Kinta, (17/06/2021) nota katak, iha maizu menus tuku 10:00 komunidade no estudante tau ona sira nia Sasan iha portu oin hodi hein ró Success atu ba Oe-Kuse. Iha portu Dili maioria estudante husi Oe-Kuse mak hamriik no tuur iha Jardin no odamatan portu nian.

Operasaun ró Success depende husi kompañia sira ne’ebé mak manan programa sesta bazika sira aluga mak foin halo operasaun. “Ami hakarak fila ba Oe-Kuse tanba ami agora labele ona atu selu kos. Osan mós laiha atu sosa hahan. No mós ami labele aguenta ho eskola online,” deskreve Calistro.(Lee notísia seluk iha jornál Timor Post)

No More Posts Available.

No more pages to load.