ATM Failla Tanba Falta Monitorizasaun

by -49 views

DILI (Timor Post)—Diretór Ezekutivu Banku Nasionál Komérsiu Timor-Leste (BNCTL), Brigido de Sousa, rekoñese katak durante ne’e problema tékniku halo ATM no liña internet failla, ida ne’e tanba falta monitorizasaun.

Nia hato’o asuntu ne’e, relasiona ho keixa barak ne’ebé sira simu husi BNCTL ninia kliente sira tanba la tuir kliente sira ne’e hakarak durante ne’e.

“Ami rekoñese, iha problema tékniku balun mak kauza ATM failla atu serbí ita boot sira. Balun mos tanba ahi mate, liña internet mós monu, balun tanba avaria ne’ebé akontese de ves kuandu. Ami mós rekoñese dálaruma tanba falta monitorizasaun husi ami nia parte,” informa Brigido ba Timor Post via Whatsapp, Tersa (31/08).

Tanba ne’e, nia komprometidu atu hadi’a frakeza sira ne’e, lori atendimentu ne’ebé di’ak ba kliente BNCTL hotu iha Timor laran tomak.

“Ba kualkér razaun, ho haraik-an ha’u husu deskulpa tanba inkonveniénsia sira ne’ebé la podia akontese. Ami komprometidu nafatin atu hadi’a frakeza sira ne’e hodi lori atendimentu ne’ebé di’ak liu ba ita boot sira, kliente BNCTL,” nia komprometidu.

Aleinde ne’e, nia informa mos katak atu aumenta ATM iha territóriu tomak, BNCTL kompleta ona prokurasaun ATM foun hamutuk 27 inklui ATM móvel 5 no ATM drive through 2, inklui instala ATM ne’ebé bele uza depozita mós osan.

Portantu, mákina sira ne’e sei to’o iha Dili fulan Dezembru 2021. BNCTL mós akizi ona 100 mákina POS hodi fasilita kliente sira akizi sasán ka servisu sein uza osan cash.

Nia subliña, POS sira no mós ATM sei adere ba rede P24 atu fasilita tranzasaun husi kliente banku seluk iha BNCTL ninia ATM no vise versa.

BNCTL halo hela diskusaun atu fasilita kliente iha area remota ka urbana atu uza fasilidade MWALLET, foti osan ka tranzasaun seluk através ajénsia MOSAN iha mais 400 iha territóriu tomak.

“Agradese no ami konta nafatin ho ita boot sira nia apoiu, kritikas, reklamasaun, sujestaun iha media, nune’e ajuda ami korrije, hadi’a beibeik no sei transforma BNCTL sai banku ne’ebé prienxe ita boot sira nia hakaran no ezijénsia, oferese servisu ne’ebé di’ak liu, husi loron ba loron,” nia agradese.

Nia dehan, durante konfinamentu obrigatóriu ne’e, funsionamentu banku nafatin loke maibé oras atendimentu mak limita husi 09:30-14:00 lokraik Segunda-Sesta oras Timor-Leste. Ne’e aplika iha Dili no Gleno de’it, sukursál seluk funsiona tuir oras normal.(jho)

No More Posts Available.

No more pages to load.