Atauru Express-Samudra Bintang 8 Substitui Transship II

by -78 views
Foto Google

DILI (Timor Post)—Autoridade Portu Timor-Leste (APORTIL) halo ona aproximasaun ho Ferry Atauru Express no LCT Samudra Bintang 8 hodi subtitui Ró Tranship II ne’ebé durante halo operasaun Dili-Oekusi no Dili-Atauru.

Pontu Vogál I Autoridade Portu Timor-Leste (APORTIL), José Madeira Marques, hatete governu buka subtitui ro Tranship II ho razaun tanba kondisaun ro inklui kontratu ne’ebe kustu boot.

“Agora ita ko’alia ho Ferry Atauru Express, ita mós ko’alia ho parte regulator, antes ro ne’e halo viajen hanesan baibain, ita tenke haree ninia safety bazeia ba standard internasionál ne’ebe iha, no ita haree fali ba Ro LCT Samudra Bintang 8,” informa José Oliveira, iha nia knar fatin Portu Dili, Sesta (27/08).

Nia informa, kada semana rua halo operasaun no sei tula uluk kargu ka sasán báziku sira, depois maka tula pasajeiru sira.

Portantu, APORTIL mós husu ba Ferry Samudra Bintang 8 atu instala fatin ba pasajeiru sira, nune’e bele asegura pasajeiru sira no tenke haree mós kapasidade Ro ne’e bele tula pasajeiru.

“Iha serka sanitaria ne’e tenke iha koordenasaun ho SIJK, sira mak deside ro ne’e bele tula ema na’in hira, bele ba ka la’e, funsaun APORTIL ne’e fasilita de’it,” nia hateten.

José salienta, funsaun husi APORTIL nian atu fasilita operasaun ferry maibé desizaun ne’e husi sentru integradu jestaun krize mak bele foti atu tula pasajeiru ho montante hira.

Nia dehan, APORTIL la fó kontratu ba sira maibé atu fasilita viajen ba Ataúru no Oekusi atu halo operasionál tuir ida-idak nia destinasaun, maibé tenke iha koordenasaun ho entidade relevante sira.

Tanba ne’e, kuandu koordenasaun ne’e di’ak ona, ferry rua ne’e sei fó sai oráriu ba operasaun nian.

“Ita laiha kontratu ho sira maibé ita sei fasilita servisu ida ne’e, ita mós iha hanoin atu tula pasajeiru ne’e, duke ita buka ro foun ida. Subsídiu mina hira mak atu fó ba sira depois sei ko’alia hamutuk fali hodi deside, ne’ebé ha’u labele ko’alia uluk,” nia katak.

Entretantu, ro Tranship II governu hapara ona, no ro Berlin Nakroma daudaun ne’e seidauk bele hala’o manutensaun tanba situasaun Covid-19 inklui mós ro Success ne’ebé dokumentu mate ka liu data ona.(jho)

No More Posts Available.

No more pages to load.