Ataka Polísia, Karreta Patrullamentu Rahun: Na’in-Rua Tama Sela

by -1.627 views
Superentendente Xefe Henrique da Costa

Jornalista Jaime Pires / Editór Noémio Falcão

DILI (Timor Post)—Joven grupu ida derepente de’it ataka ekipa polísia patrullamentu husi Eskuadra Don Aleixo nian ne’ebé hala’o hela knaar iha terrenu. Joven hirak ne’e balu halai lakon maibé polísia konsege hiit tiha na’in-rua.

Komadante Polísia Nasionál Timor-Leste (PNTL), Munisípiu Dili, Superentendente Xefe Henrique da Costa ba Jornalista sira iha nia servisu fatin, Kaikoli, Dili, Tersa (28/09/2021) haktuir, akontesimentu ne’e iha Domingu madrugada (26/09/2021) iha Aldeia Lauloron, Suku Madohi, Postu Administrativu Don Aleixo.

“Ita nia ekipa patrullamentu husi eskuadra Dom Aleixo ba halo patrullamentu mak joven grupu ida tur ekipa foin tun sira tuda hasoru no tuda rahun karreta patrullamentu nia vidru oin ne’e rahun hotu,” Komandante Henrique haktuir.

Iha momentu ne’eba ekipa patrullamentu foti kedas medida halo atuasaun hasoru joven sira ne’e no konsege kaptura ema na’in-rua.

“Suspeitu na’in-rua kaptura ne’e mak ho inisial (LG) no (JG) ho idade joven, agora dadaun ita detein ona iha ita nia sela Komandu PNTL Munisípiu Dili,” deklara Komandante Henrique.

Nia reforsa, Detein hodi parte investigasaun kontinua halo prosesu hodi kontinua ba iha prosesu hafoin sira kompleta durante oras 72, mak parte investigasaun Dom Aleixo nia sei aprezenta ba Ministeriu Públiku hodi hare ba kazu refere.

No More Posts Available.

No more pages to load.