Asistente Superientendente Abrão Quintas troka Inspetor Alex Samurai iha Parlamentu Nasionál

husi -324 views

Timor Post (23/11/2020)—Komandu Polísia Nasionál Timor Leste (PNTL) halo rotasaun servisu hodi nomeia fali Asistente Superientendente Abrão Dias Quintas troka Alexandrino da Costa ‘Samurai’ nu’udar Komandante Polísia Postu Seguransa iha Parlamentu Nasionál.

Entretantu Alex Samurai muda fali ba Kompañia Korpu Seguransa Pesoal (CSP sigla Portugués).

“Ha’u muda hosi parlamentu nasionál sei destaka fali ba iha Komandu Unidade Polísia, Kompañia Korpu Seguransa Pesoal,” Alex Samurai informa ba jornalista sira hafoin sermonia entrega kargu hanesan Kamandante Polísia Postu Seguransa iha Parlamentu ba komandante Polísia foun iha Parlamentu Nasionál, Segunda (23/11/2020).

Alex klarifika, transferénsia servisu ne’e hosi komandu jerál. Nia agradese tanba konfiansa husi komandu durante tinan tolu hala’o lidera parte seguransa iha Parlamentu Nasionál.

Alex esplika, tuir lei orgánika parlamentu nasionál kona-ba seguransa iha artigu 21, ba pozisaun nu’udar komandante hanesan iha órgaun soberanu ida nia tenke ofisial superior, maibé tanba konfiansa maka nomeia de’it nia hanesan inspetur.

“Tuir lei orgániku parlamentu, lei seguransa iha artigu 21 iha ne’eba nomeia komandu no nomeia ofisial superior, ofisial superior tanba durante tinan tolu komandu jerál konfiansa no parlamentu nasionál fo nomeiasaun mai ha’u hanesan inspetor maibé bele kaer serbisu iha PN durante durasaun tinan tolu nia laran, ne’ebé ha’u hanoin agradese tanba ida ne’e mak ami nia serbisu duni,” Alex Samurai subliña.

Iha oportunidade Alex hatete, mudansa ida ne’e laiha relasaun ho akontesimentu semana hirak liu ba bainhira nia ho Deputadu FRETILIN, David Dias Ximenes deskuti malu kona-ba karreta para fatin.

“Ha’u hanoin laiha dezentendimentu entre relasaun ho akontesimentu iha loron hira liu ba, tanba ohin Prezidente parlamentu nasionál deklara katak ida ne’e órdem transferénsia serbisu ne’e normal, ne’e kompeténsia iha ita nia prezidente parlamentu atu hadi’a kompeténsia seguransa maibé liña koordenasaun entre komandu jerál no mos ba iha komandante unidade sira ne’e sempre iha liña koordenasaun ne’e la’o, nebe, transferénsia ida ne’e  hanesan transferénsia serbisu normal ninian,” Alex subliña.

Iha fatin hanesan Komandante Polisia foun Postu Seguransa iha Parlamentu Nasionál, Asistente Superientendente Abrão Dias Quintas, hatete, sei hala’o kna’ar ne’e ho di’ak.

Nia esplika, gabinete seguransa parlamentu nian antigamente prezidente parlamentu husu atu tau ofisial superior maibé seidauk iha tan ne’e mak tau Komandante Alex hala’o kna’ar hanesan ofisial superior iha parlamentu.

“Maibé agora tanban iha nesesidade prezidente parlamentu rasik mak husu tenke tau ofisial superior. Tanba ne’e  komandu responde hodi nomeia ha’u mai iha fatin ida ne’e hodi subtitui fali ami nia inspetor Alex ne’ebé serbisu ona iha parlamentu durante tinan tolu nia laran ona,” nia dehan.

(Jornalista : Julio Salinas Soares)