Asidente Maubisse, Na’in-Ida Mate iha Dalan ba Dili

by -972 views
Komandante Polísia Tránzitu Maubisse, Felix Maria de Araújo

Kontributor Rádio Komunidade Maubisse Mauloko / Editór Noémio Falcão

DILI (Timor Post)—Vítima ida husi na’in-34 ne’ebé hetan asidente ho karreta baku fila iha estrada boot Suku Hohrai-Kiik, Postu Administrativu Maubisse, Munisípiu Ainaro, mate bainhira evakua husi Hospital Referrál Maubisse ba Hospital Nacional Guido Valadares (HNGV), Dili.

Diretora Hospital Referál Maubisse, Doutora Gabriela da Conceição Pereira haktuir, nia parte transfere uluk pasiente na’in-6 ne’ebé konsidera grave iha asidente ne’e ba HNGV, maibé iha dalan na’in-ida hakotu iis.

“Na’in-neen mak rujuk, hela na’in-haat (grave). Balun sei baixa hela iha ne’e. Mate na’in-ida ne’e mai ona iha ospitál, rujuk ba (Dili) maka mate iha dalan,” Diretora Gabriela haktuir.

Karreta vaskolante ho númeru matríkula 54-261 TL baku fila iha loron Kinta (02/09/2021) maizumenus tuku 9 dader. Vítima sira kompostu husi feto na’in-9, mane na’in-25. Objetivu viajen família sira lori feto foun husi husi Aldeia Datiri, Suku Mulo, Postu Hatubuiliko, Munisípiu Ainaro atu ba Postu Administrativu Letefoho-Munisípiu Ermera.

Entretantu Komandante Polísia Tránzitu Maubisse, Felix Maria de Araújo informa, nia parte halo hela investigasaun ba asidente ne’e no rejista sidadaun hirak iha karreta laran ne’e husi Aileu no Ermera.

“Sira ba hafolin feto iha Suku Mulo. Fila maka karreta halai maka’as kondutor lakon kontrolu,” Komandante Felix subliña.

Nia dehan, hafoin akontesimentu nia parte to’o kedas iha fatin hodi halo evakuasaun liuliu ba sira ne’ebé kanek grave.

Total ema iha karreta laran hamutuk na’in-34. Husi total ne’e na’in-16 kanek todan no na’in-18 kanek kmaan.

No More Posts Available.

No more pages to load.