Asembleia Exstra-ordinária Rede Feto, Zélia Fernandes Troka Yasinta Lujina

by -140 views

Timor Post (27/03/2021)—Organizasaun membru no fundador Rede Feto Timor Leste (RFTL), iha loron Sesta (26/03/2021) konvoka asembleia extra-ordinária no konsege hili fali Zélia Fernandes hodi troka Prezidente sesante Yasinta Lujina.

Organizasaun membru no fundador sira organiza asembleia extra-ordinária ho rajaun, Pezidente sesante Yasinta nia lideransa akujadu paraliza funsionamentu normal iha RFTL, halo abuzu podér, konflitu interese, la promove, la defende, la dignifika, hamonu no hafoer RFTL iha públiku ho konsientemente no ho propózitu.

Asembleia ne’ebé hala’o iha Salaun Convivência Me Margarida, Kaikoli-Obrigado Barach, Dili ne’e, bazeia ba artigu 19 Estatutu RFTL kona-ba autoridade deliberativu no podér supremu; artigu 20 kona-ba tipu asembleia no artigu 22.3 kona-ba funsaun no prosedimentu asembleia.

Maske nune’e, Prezidente sesante Yasinta ba Timor Post via telefone hatete, nia parte laiha koñesimentu ba asembleia ne’e.

“Ha’u la hatene duni. Ami nia interina mak informa duni ba ami katak sira husu atu utiliza fatin, maibé informasaun direta mai ami konsellu laiha. Ami laiha informasaun atu partisipa. Ne’e diluar ami nia koñesimentu,” Yasinta subliña.

Yasinta la komenta kona-ba razaun sira ne’ebé obriga asembleia extra-ordinária ne’e akontese, tanba nia dehan, durante ne’e nia parte hala’o servisu normal hela.

“Tanba situasaun serka sanitária, maibé atividade la para. Ita nia programa balu liu husi zoom. Programa ne’ebé mak iha la’o nafatin,” Yasinta hatete.

Entretantu asembleia extra-ordinária ne’ebé hala’o sein partisipasaun husi parte Prezidente sesante ne’e, membru organizasaun no fundador sira hamutuk 33 (prienxe 2/3) liuhusi votus aklamasaun (votus direta no via zoom) hili lista úniku ba Prezidente RFTL foun Zélia Fernandes ho nia estrutura sira inklui; Vise Prezidente I, Teresa de Carvalho; Vise Prezidente II, Gizela de Carvalho; Sekretária, Sekretária Cecilia da Fonseca; Tezoreira, Dorotea Kesse; Haforsa Instituisaun, Márcia de Oliveira; Advokásia, Maria Domingas Fernandes Alves; Rede Servisu, Maria Dias;  Kapasitasaun, Maria Imaculada Guterres.

Hafoin asembleia, Prezidente eleitu Zélia Fernandes agradese ba konfiansa tomak husi membru organizasaun no fundador sira hotu.

Nia subliña, sei hala’o kna’ar tuir mandatu ne’ebé iha hodi serví interese hotu tuir estatutu haruka.

“Ami sei hala’o tuir de’it mandatu ne’ebé maka hatúr ona iha estatutu Rede Feto Timor Leste. Mandatu espesiál ida maka atu organiza no fasilita kongresu nasionál Feto Timor Leste nian kada tinan lima dala ida,” Zélia subliña.

Prioridade daruak maka, bazeia ba pilar haat (4) inklui networking, advokasia, kapasitasaun no haforsa instituisaun.

Atu hala’o prioridade ne’ebé iha, Zélia afirma, sei rejolve uluk situasaun internál iha RFTL.

“Ami sei deskuti klean liu hodi hatúr prioridade sira ne’ebé iha reuniaun dahuluk iha semana hirak tuir mai,” Zélia salienta. (cao)

No More Posts Available.

No more pages to load.