Dili (TimorPost.com)—Grupu Arte Marsial (GAM) iha hela diskusaun ameasadu, tanba orgaun estadu hahú haka’as lider arte marsiál sira, atu rezolve problema sira ne’e durante fulan rua, se la kumpre mak sei hola desizaun polítiku.
“Ami fó sira prazu entre fulan ida to’o fulan rua ba lider ho membru arte marsial, kuandu sira la konsege kontrola sira nia membru sira, lakonsege rezolve problema interna, ne’e ami sei rekomenda buat ruma ba konsellu ministrus,” Ministru Interior (MI), Francisco da Costa Gutrres, informa ba jornalista sira, hafoin partisipa misa, agradesimentu loron konsulta popular iha Igreija Balide, Kuarta (30/08/2023).
Ministru ne’e hatete, parte seguransa nian iha ona hanoin ruma katak sei husu atu organizasaun arte marsial sira, tenke kontrola sira nia membru no sira tenke rezolve sira nia problema interna, Governu liuhusi Ministru Interior sei hola desizaun ruma ba konsellu ministru, atu kria pás ho hakmatek iha rai laran.
Tanba problema sira ne’ebé mak arte marsial sira komete ba situasaun sira daudauk ne’e, la’ós problema boot, maibé sira grupu arte marsial provoka malu beibeik mak sei provoka to’o situasaun ida boot liu ida ne’e.
“Ha’u hanoin ami bele foti desizaun ruma atu tau pás ho hakmatek, tanba ita halo problema hanesan ne’e, la’ós problema boot, más problema ne’e tanba kestaun interna entre arte marsial bele provoka situasaun sai boot”, nia hateten.
Nia esplika, ligadu problema GAM Ministériu Interior husu ona ba iha KRAM, liuhusi Ministeriu Juventude Desportu no Kultura, atu halo reuniaun ho KRAM hodi relata rekomendasaun ruma mai Governu kona-ba situasaun sira ne’e.
“Ha’u ko’alia ona ho Ministru Juventude Desportu no Kultura fó hatene ona KRAM atu sira tenke reuniaun para foti desizaun, foti rekomendasaun ruma mai iha governu”, nia esplika.
Liuhusi oportunidade ne’e, MI husu para lider arte marsial ida-idak tenke kontrola sira nia membru, nune’e Governu lalika uza forsa atu bele hapara violensia sira ne’e.
“Ita husu ba malu hanesan Timoroan, ita apela katak ita la presiza tenke uza forsa mak hodi para, más ita ho ita nia konsiénsia ho ita nia hanoin, ita nia auto tolensia hanesan Timoroan ita respeita malu”, nia afirma.
Nia hato’o lia-menon katak se iha diferensia ruma ko’alia ba malu, diálogu, la’ós mai fali uza fali forsa atu obriga malu atu tuir malu lae, se la konkorda malu bele la’o ida-idak nian. Maibé problema mak tenke para ona ka lalika uza tan violensia atu obriga ema seluk atu tuir ita, ne’e maka labele.
1,977 total views, 6 views today
