Arsenio Haksolok ho Berlin Ramelau no Promete Ró Haksolok To’o Dili 2022

by -1.602 views
Presidente Autoridade Rejiaun Administrativu Espesial Oe-Kusi Ambeno (RAEOA), Arcenio Bano

Jornalista Jaime Pires / Editór Noémio Falcão

Dili (Timor Post)— Presidente Autoridade Rejiaun Administrativu Espesial Oe-Kusi Ambeno (RAEOA), Arcenio Bano sente haksolok ho prezensa ró Berlin Ramelau no promete ró Haksolok to’o Dili iha tinan 2022.

Ba jornalista sira iha nia rezidensia ZEESM, Farol, Dili, Sesta (10/12/2021) hafoin hasoru malu ho Sekretáriu Estadu Juventude no Desportu (SEJD), Abrao Saldanh, subliña, ró Berlin Ramelau bele fasilita ona pasajeirus ba mai Dili-Oekusi no Ataúro.

“Ha’u haksolok tebes no agradese ba governu sentrál liuliu ba Ministeriu Transporte no Komunikasaun,” Arsenio hatete.

Ró ne’e sei hasai Oe-Kusi husi izolamentu  tanba durante ne’e povu Oe-Kusi no Ataúru sempre problema iha via marítim.

“Ha’u mós agradese ba kompañia Ataúru Expres ne’ebé mak durante ne’e prenxe hela lakunas hirak ne’e,” Arsenio hatutan.

“Tinan oin ami sei servisu maka’as ba Ró Haksolok, tanba faze primeiru ita halo tiha ona ita kontrola estaleiru ho ró ne’e rasik ita tama ona iha reabilitasaun, entaun fulan tolu ka haat mai tan ita sei hatene loloos ró ne’e bainhira mak hotu,” Arsenio subliña.

Entretantu Eis Prezidente RAEOA, Marí Alkatiri maka prosesa fábrika ró Haksolok iha Portugal, gasta tiha ona osan too agora ró ne’ebé nia rasik ba hala’o ona serimónia lansamentu ba tasi maibé seidauk mai Timor Leste. No governu daualu lideradu Primeiru Ministru Taur Matan Ruak propoin tan orsamentu adisionál millaun $14.

Relasiona ho kestaun ne’e, Komisáriu Komisaun Ant’i Korrupsaun (KAK), Sérgio Hornai haktuir, maski nia parte seidauk hetan delegasaun kompeténsia husi Ministériu Públiku (MP) hodi halo investigasaun ba kazu ró Haksolok maibé sira dezenvolve, akumula ho inisiativa buka tuir ona kona-ba evidénsia.

Sérgio klarifika, normalmente KAK tenke hetan delegasaun kompeténsia husi MP maka bele hala’o prosesu ba kazu ida. Maibé, notísia ida ne’e (kazu ró Haksolok) espalla no dezenvolve dadaun ona, tanba mídia ho komunidade iha preokupasaun oioin.

Nia rekoñese, kazu ne’e sei kait hela iha Tribunal Kâmara Kontas ninia kompeténsia.

“Normente prosesu ne’e tenke la’o neineik no kleur tanba atu identifika ema korrupsaun ne’e tenke la’o neineik, halo komparasaun karik ita ho karreta Kijang ita labele duni ema karreta hanesan Prado tanba ita duni mós la toman, tanba ne’e presiza tempu,” Sérgio subliña ba Jornalista sira iha Salaun Komisaun Nasionál Eleisaun (KNE) Kolmera, Kinta (09/12/2021), hafoin selebra loron mundiál antí korrupsaun.

Entretantu Diretór Forun Organizasaun Naun Governamental Timor-Leste (FONGTIL), Daniel Santos do Carmo konsidera Prokurador Jerál Repúblika (PJR) no Ministeriu Públiku (MP) mak taka kazu Ró Haksolok.

Ba Jornalista sira iha servisu fatin Kaikoli-Dili hafoin komemora loron Mundiál Anti Korrupsaun, Daniel hatete, tinan-tinan selebra loron antí korrupsaun maibé ba tinan ida ne’e nia kestiona maka’as prosesu justisa ba kazu ró Haksolok.

“Ró Haksolok ne’ebé mak gasta tiha ona $14 Milloes iha tinan 2016, maibé to’o agora Ró ne’e ninia paradeiru inserteza, maski relatóriu husi Tribunal Kontas remata ona maibé Ministeriu Públiku no Prokurador Jerál Repúblika seidauk agresivu hodi halo asaun ruma,” Daniel lamenta.

Nia dehan, Ministeriu Públiku ka Prokurador Jerál Repúblika seidauk delega kompetensia ba Komisaun Anti Korrupsaun ne’ebé mak hanesan polísia espesialista atu loke investigasaun ruma ba situasaun  Ró Haksolok hatudu parte rua ne’e maka hakarak duni hamate prosesu ne’e.

“Tanba ita nia dalan boot atu ba hetan Justisa mak Ministeriu Públiku no Prokurador Jerál Repúblika, se sira na’in-rua ne’e mak agresivu KAK bele iha komisáriu na’in-rua, na’in-tolu mós sei la halo buat ida,” Daniel hatete.

Tanba kazu sira hanesan Ró Haksolok kazu USB ka sira seluk tan mak Ministeriu Públiku no Prokurador Jerál Repúblika la promove no la agresivu konsidera ida ne’e hanensan kazu KAK bele halo uma boot hola karreta barak tau adjuntu barak maibé sei la halo milagre ida tanba Ministeriu Públiku no Prokurador Jerál Repúblika la agresivu.

Ho ida ne’e mak presiza Ministeriu Públiku no PJR nia apoiu barak ba KAK hanensan polísia espesial ba korrupsaun, entaun kazu sira ne’ebé mak indisiu ba korrupsaun PJR tenke delega ba KAK hodi bele halo ida ne’e.

“Sira la delega KAK bele foti inisiativa bele halo hotu prosesu sura ne’e inklui dadus sira hotu, maibé ba to’o iha Ministeriu Públiku no PJR sira bele ignora tiha dehan ida ne’e la prenxe elementu krime entaun bele dada malu iha ne’ebá,” Nia hakotu.

No More Posts Available.

No more pages to load.