Apoiu Programa Sesta Bázika, Xefe Suku Sira sei Simu Osan $200

by -86 views

Timor Post (09/12/2020)—Governu liuhusi Konsellu Ministru (KM) aprova tiha ona subsídiu ho valor $200 ba xefe suku sira hodi hala’o sira nia kna’ar apoiu ba governu iha implementasaun programa rekoperasaun ekonomika sesta bázika.

Prezidente Konsellu Ministru, Fidelis Leite Magalhães hatete, projetu dekretu lei fó subsídiu ka insentivu ba Xefe suku sira ho nia estrutura suku ne’e, aprezenta hosi Ministru Administrasaun Estatal, Migual Perreira de Carvalho.

“Konsellu ministru ohin aprova projetu dekretu lei ida hosi MAE ne’ebé mak fó insintivu finanseiru extraordinariu ba xefe suku sira,” Fidelis ba Jornalista sira iha Palásiu Governu, Dili, Kuarta (09/12), ne’e hafoin remata reuniaun konsellu ministru extra-ordinariu.

Objetivu atu fó subsídiu insentivu ba Xefe Suku sira mak, hanesan rekunesementu ida ba iha Xefe Suku no autoridade suku nia ne’ebé mak durante ne’e fó apoiu ba inisativa governu nia iha ambitu rekoperasaun ekonomia iha kontestu sesta bázika ninia.

Entaun ho dekretu lei ida ne’e xefe suku sira sei hetan aubsidiu insentivu finanseiru atu bele hala’o sira nia kna’ar sira hodi fó apoiu ba iha governu iha implementasaun programa rekoperasaun ekonomika.

Nia mós sublina, kona-ba planu atu implementa ne’e ministeriu implementador mak sei hatene no atu tau osan hira ba ida ne’e mós MAE mak bele esplika klaru.

“Kona-ba montante Xefe Suku na’in ida sei hetan $200 dolar Ba ninia kontribuisaun, no sira seluk iha estrutura suku nia hetan dolar $100” nia hakotu.(Jornalista: Jaime Pires)

No More Posts Available.

No more pages to load.