ANJHN Produs Adubu Orgániku hosi Modo Aat

by -95 views
Brosur Produs Aihan

DILI (Timor Post) — Asosiasaun Nasionál Juventude Hadomi Natureza (ANJHN), buka osan liu hosi dalan halo produsaun adubu orgániku hosi modo aat no hudi kulit hodi nakfilak sai rai metan.

Membru ANJHN, João da Costa Freitas, hatete ideia ida produs adubu orgániku ne’e, mai hosi membru sira, ne’ebé hetan matéria ida kona-ba edukasaun ambientál ko’alia liu kona-ba lixu.

Nia hatutan, lixu ne’e iha oin rua, orgániku no non orgániku, maibé ida ne’ebé mak afeta liu ba saúde mak lixu orgániku ne’ebé ko’alia kona-ba modo aat no hudi kulit, ho ida ne’e membru sira iha hanoin ida hodi buka aruma fali sasán sira hodi produs fali adubu orgániku.

“Ideas ne’e ami implementa iha fulan Janeiru ate agora hodi produs adubu ne’e, hahú Serka Sanitaria ami nia membru barak mak hosi munisípiu, kuaze sira la ba munisípiu, entaun ami buka osan liu hosi halo adubu ne’e, nune’e labele fó todan (beban) ba inan aman sira bainhira sira ba foho,” João da Costa Freitas haktuir ba jornalista sira iha sede ANJNH-Bekusi Dili, Sesta (23/07).

Nia haktuir, prosesu atu halo tenke ba merkadu no loja atu ba foti modo aat no hudi kulit sira, lori mai dulas dodok, nune’e sira halo neutraliza ho buat sira ne’ebé halo maran, buka ai-uut ho ai-tahan maran hodi dulas, depois mak kahur hamutuk, prosesu halo nee kuaze han tempu fulan ida resin, ami produs hosi Janeiru ate agora.

“Referénsia ami foti hosi internet depois kolega sira nia matéria aplikasaun ida tradús no hanorin mai ami ne’e adubu orgániku iha Timor. Ami buka referénsia adubu orgániku ne’ebé instala iha parte Baukau no Ermera, nune’e ami foti referénsia no prosesu sira halo, ami konsensu no halo hanesan ne’e presiza fulan hira, maibé sira dehan prosesu presiza fulan tolu ou neen hafoin sai rai metan. Maibé ikus mai ami koko fulan rua de’it sai dodook loos tiha ona,” nia esplika.

Nia hatutan, iha ne’e membru kuaze mai husi munisípiu hodi fa’an fali adubu, tanba atividade Serka Sanitaria ne’e komesa mosu ona, entaun sira komesa kuda ona ai-funan tanba atividade la iha.

Nia hatete, husi ne’e komesa posting iha facebook ema komesa hola, entaun sira fa’an karon ida $3, iha semana ida nia laran husi segunda to’o Kinta dala ruma hetan $30 ba leten no Sesta to’o Domingu hetan $100 ba leten no osan sira ne’e sira tau hamutuk depois halo fali nesesidade bázika, hanesan foos, modo, bee no enxe mina ba motor.

“Ami mós iha inisiativa ida atu fahe gratuita ba komunidade agrikultór sira, tanba ami nia grupu ideas hanesan ne’e, maibé tama tiha ba Serka Sanitaria ami aplika fali ba nesesidade bázika”, nia hakotu. (PJ2/PJ13)

No More Posts Available.

No more pages to load.