Aniversáriu ba dala-22, PNTL Kontinua ‘Halerik’ Menus Fasilidade no Kapasitasaun

by -390 views
Komisariu Jerál Polísia Nasionál Timor-Leste (PNTL), Faustino da Costa. Foto TP/ Jaime Pires

(Reportajen Jaime Pires/Editor Mateus da Cruz)

Dili (Timor Post)- Iha ámbitu aniversáriu PNTL nian ba dala- 22, Komisáriu Jerál Polísia Nasionál Timor-Leste (PNTL), Faustino da Costa, hatete, oras ne’e daudaun PNTL sei kontinua hasoru dezafiu barak hodi  dezenvolve instituisaun ne’e sai forte hanesan nasaun avansadu sira seluk, liu-liu kapasitasaun ba membru sira no ekipamentu ba PNTL ne’ebé sei menus.

“PNTL harii iha tinan 2000 agora tinan 22 ona, ne’ebé iha buat barak mak halo mudansa inklui ba infraestrutura PNTL, nia maski balun sei menus, maibé ko’alia kona-ba dezafiu ne’e barak tebes mak ita hasoru, liu-liu kapasitasaun ba membru sira no mós ekipamentu,” nia dehan ba jornalista sira, hafoin selebra aniversáriu PNTL, iha Sentru Formasaun Polisia, Komoro, Domingu (27/03).

Nia hatete, agora iha era modernizasaun ne’e presiza halo kapasitasaun di’ak liután ba membru sira no mós rekursu materias hodi antesipa ba tipu modelu krime ne’ebé agora mosu barak tebes ne’ebe la’os fasil atu implementa.

“Hanesan Krime doméstika no krime organizadu sira kontinua mosu, maski PNTL halo nafatin sensibilizasaun, hanesan ID falsu  sira ne’e, tanba ema iha tasi sorin mós bele kria ID Falsu, hodi tolok lider nasionál sira no uza hodi insulta malu,” tenik nia.

Maski ho limitasaun sira ne’e, nia dehan, PNTL sei esforsu másimu hodi kapasita an nafatin, no apoiu husi entidade tomak ninian bele sai di’ak liután iha futuru.

Entretantu, Prezidente Repúblika (PR), Francisco Guterres ‘Lú Olo’, iha serimónia aniversáriu ne’e enkoraja PNTL atu prezensa maka’as liután iha komunidade nia leet hodi halo vijilánsia no prevensaun ba krime.

“Konsellu Polisiamentu Komunitária tenke prezensa maka’as liutan iha komunidade no asegura seguransa komunidade ho objetivu atu haforsa sira-nia sentimentu seguransa,” nia dehan.

Nia dehan, PNTl tenke garante orden no ambiente hakmatek inklui proteje ema ho sasán nune’e bele kria kondisaun ba dame, seguransa no estabilidade iha Timor Leste.

Serimónia selebrasaun ne’e, hetan partisipa husi Prezidente Repúblika, Francisco Guterres Lú Olo, Primeiru Ministru nu’udar mós Ministru Interior, Taur Matan Ruak, Xefe Estadu Maior Jerál F-FDTL, Tenente Jenerál Domingos Raul ‘Falur Rate Laek’, Embaixada no reprezentante sira hamutuk ho parseiru sira seluk.(Asesu Notísia seluk iha Jornál Timor Post/ Asesu You Tube Timor Post)

No More Posts Available.

No more pages to load.