Desizaun Ezonera Cedelízia Hamihis Valor Prémiu Raos Magsaysay Award ba Aniceto Guterres

by -63 views

Timor Post (25/11/2020)—Prezidente Parlamentu Nasionál Aniceto Guterres nia desizaun ba ezonerasaun Cedelízia Faria dos Santos husi kargu Sekretária Jerál Parlamentu Nasionál konsideradu hamihis valor prémiu ne’ebé nia hetan ho naran Raos Magsaysay Aword iha Filipina iha tinan 2003 liu ba.

Raos Magsaysay Aword nu’udar prémiu ba pessoa ne’ebé luta ba direitus umanus, maibé Aniceto nia desizaun ba Cedelízia kontra prinsípiu husi prémiu ne’e, tanba desizaun ba ezonerasaun Cedelízia nakonu ho ódiu no vingansa.

“Ezonera feto ida ne’ebé laiha eru grave ne’ebé nia halo maibé interese partidu ezonera feto ida kualidade tebes i profesional ba servisu hodi nomeia fali ninia ema partidu mane ida hodi asumsi kargu refere,” Deputada Maria Barreto hatete ba Timor Post hafoin desizaun Aniceto ba Cedelísia iha loron 24/11/2020.

Maria hatutan, Aniceto nu’udar mós pesoa ne’ebé senior iha área jurídiku la devia foti desizaun ne’e.

“Ohin, 25 Novembru – 10 Dezembru Mundo inklui Timor Leste komemora Loron 16 kampaña ativizmu kontra violénsia bazeia ba jéneru. Oinsá atu dehan la’e ba tipu violénsia saida de’it kontra feto, labarik feto no membru komunidade hahú husi uma laran no fatin públiku, se órgaun estadu ida ezonera feto ida la ho sensivél jéneru, duvidas boot ba implementasaun CEDAW iha Timor Leste ne’e rasik,” Maria Barreto subliña.

Entretantu Sekretária Jerál Parlamentu Nasionál Sesante, Cedelízia Faria dos Santos deklara sei lori Prezidente Parlamentu Nasionál (PN), Aniceto Guterres ba tribunál relasiona ho desizaun ezonera nia husi nia kargu la ho rajaun fundamental.

Cedelízia afirma, hanesan sidadaun nia iha direitu ba prosesu ida ne’e tanba konsidera rajaun sira ba ezonerasaun nakonu ho akujasaun oioin. No la simu ho prosesu ezonerasaun ne’ebé konsideradu la tuir prosesu normal.

“Ha’u sei hatama keixa, lia loos tenke ko’alia. Hanesan sidadaun ida ita nia lei inan mós fó dalan,” Cedelízia subliña ba Timor Post hafoin simu karta ezonerasaun husi Prezidente Parlamentu Nasionál, Aniceto Guterres, iha loron Tersa (24/11/2020).

Entretantu rajaun husi desizaun ne’e tanba akuja Cedelízia la fasilita plenária iha loron 18-19 fulan Maiu 2020, iha ne’ebé mosu tensaun maka’as entre deputadu sira to’o harahun meza Prezidente Parlamentu Nasionál.

Rajaun seluk maka Cedelízia konsideradu la toma responsabilidade ba atividade sira durante ne’e iha Parlamentu Nasionál inklui ahi eletrisidade mate bianhira plenária la’o hela.

Prezidente Parlamentu Nasionál, Aniceto Guterres iha loron ne’ebé ezonera Cedelízia, nomea fali Adelino Afonso de Jesus hodi asumi Sekretáriu Jerál Parlamentu Nasionál. (cao)

No More Posts Available.

No more pages to load.